പുല്ലകയാറ്റിലും മണിമലയാറ്റിലും ജലനിരപ്പുയര്‍ന്നതോടെ കൂട്ടിക്കല്‍ ചപ്പാത്തും മുണ്ടക്കയം കോസ് വേയും കരകവിഞ്ഞൊഴുകുന്ന സാഹചര്യത്തിലാണ്. കൂട്ടിക്കല്‍, മുണ്ടക്കയം, കോരുത്തോട്, കൊക്കയാര്‍, പെരുവന്താനം പഞ്ചായത്തുകളിലെല്ലാം ശക്തമായ മഴയാണ് രേഖപ്പെടുത്തിയത്.
ചിലയിടങ്ങളില്‍ റോഡിന്‍റെയും വീടുകളുടെയും സംരക്ഷണഭിത്തി തകര്‍ന്നു.മണിമലയാറ്റില്‍ ജലനിരപ്പ് ക്രമാതീതമായി ഉയര്‍ന്നതോടെ മുണ്ടക്കയത്തിന് സമീപത്തുള്ള സ്കൂളുകള്‍ക്ക് ഇന്നലെ ഉച്ചകഴിഞ്ഞ് അവധി നല്‍കി. ഉച്ചയ്ക്ക് ശേഷം മഴയ്ക്ക് നേരിയ ശമനമുണ്ടായിരുന്നെങ്കിലും വൈകുന്നേരം നാലോടെ വീണ്ടും മഴ ശക്തിപ്രാപിച്ചു. രാത്രിയിലും ശക്തമായ മഴയായിരുന്നു ഈ ഭാഗങ്ങളിൽ ഉണ്ടായത്. അടിയന്തര സാഹചര്യം നേരിടുവാൻ വിവിധ വകുപ്പുകള്‍ സുരക്ഷാക്രമീകരണങ്ങള്‍ ഇവിടെ ഒരുക്കിയിട്ടുണ്ട്.
ഏയ്ഞ്ചല്‍വാലി പാലത്തില്‍ വെള്ളം കയറുന്ന സ്ഥിതിയിലെത്തിയിരുന്നു. മേഖലയില്‍ മണിമലയാറും അഴുത, പമ്ബ, നദികളും തോടുകളും കര കവിഞ്ഞൊഴുകി. പൊരിയന്മല ഭാഗത്ത് റോഡിന്‍റെ കോണ്‍ക്രീറ്റ് സംരക്ഷണഭിത്തി വീടിന്‍റെ സമീപത്തേക്ക് ഇടിഞ്ഞുവീണു. മുക്കൂട്ടുതറയിലെ പഴക്കം ചെന്ന ഷോപ്പിംഗ് കോംപ്ലക്സ് കെട്ടിടത്തില്‍നിന്നു കോണ്‍ക്രീറ്റ് കഷണങ്ങള്‍ അടര്‍ന്നുവീണ് അപകടമുണ്ടായെങ്കിലും ആര്‍ക്കും പരിക്കില്ല.
