തമിഴ്നാട് ദിണ്ടിഗലിൽ സ്വകാര്യ അസ്ഥിരോഗ ആശുപത്രിയിൽ വൻ തീപിടിത്തം. 7പേർ മരിച്ചു. 24 പേർക്ക് പൊള്ളലേറ്റു. മരിച്ചവരിൽ 3 വയസ്സുള്ള കുട്ടിയും 2 സ്ത്രീകളും ഉൾപ്പെട്ടതായാണ് വിവരം. ഫയർ ഫോഴ്സിൻ്റെ നേതൃത്വത്തിൽ രക്ഷാപ്രവർത്തനം പുരോഗമിച്ചു കൊണ്ടിരിക്കുകയാണ്. തീ നിയന്ത്രണവിധേയമാക്കി.
ദിണ്ടിഗൽ എൻജിഒ കോളനിക്ക് സമീപം പ്രവ‍ർത്തിക്കുന്ന സിറ്റി ആശുപത്രിയിൽ രാത്രി ഒൻപതര മണിയോടെയാണ് തീപിടിത്തം. 4 നിലയുള്ള ആശുപത്രിയുടെ ഗ്രൗണ്ട് ഫ്ലോറിലെ റിസപ്ഷൻ ഏരിയയിലാണ് തീപിടിച്ചത്. ആശുപത്രിയിൽ നൂറുകണക്കിന് രോഗികളും കൂട്ടിരിപ്പുകാരും ഉണ്ടായിരുന്നുവെന്നാണ് വിവരം.
തീപിടിത്തത്തെ തുട‍ർന്ന് ഉയർന്ന പുക ശ്വസിച്ചാണ് പലരുടെയും നില ഗുരുതരമായത്. ഏകദേശം 50 ഓളം ആംബുലൻസുകൾ ഉടനെത്തി രോഗികളെ സുരക്ഷിത സ്ഥാനത്തേക്ക് മാറ്റി. 30 ഓളം പേരെ ദിണ്ടിഗൽ ആശുപത്രിയിൽ പ്രവേശിപ്പിച്ചു. ലിഫ്റ്റിൽ കുടുങ്ങിയ ആറുപേരെ രക്ഷപ്പെടുത്തി.
മന്ത്രി ഐ പെരിയസാമി ആശുപത്രി സന്ദർശിച്ചു. മുൻ മന്ത്രി സി ശ്രീനിവാസനും ജില്ലാ കളക്ടർ എംഎൻ പൂങ്കൊടിയും സ്ഥലത്തെത്തി. റിസപ്ഷൻ ഏരിയയിൽ ഉണ്ടായ ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം.
