ഭോപ്പാൽ:പെൺ സുഹൃത്തിന്റെ നായയെ രക്ഷിക്കാൻ അണക്കെട്ടിന്റെ റിസര്‍വോയറില്‍ ചാടിയ യുവാവിന് ദാരുണാന്ത്യം. ഭോപ്പാലിലെ കെര്‍വ ഡാമിലായിരുന്നു സംഭവം.
23കാരനായ സരള്‍ നിഗമാണ് മരിച്ചത്. എന്നാല്‍, വെള്ളത്തില്‍ വീണ നായ നീന്തി രക്ഷപ്പെട്ടു. ഭോപ്പാല്‍ മൗലാന ആസാദ് നാഷണല്‍ ഇൻസ്റ്റിറ്റ്യൂട്ട് ഒഫ് ടെക്‌നോളജിയില്‍ ബിടെക് ബിരുദം നേടിയ സരള്‍ നിഗം യുപിഎസ്‌സി പ്രവേശന പരീക്ഷയ്‌ക്ക് തയ്യാറെടുക്കുകയായിരുന്നു.
ഭോപ്പാല്‍ നഗരത്തിന് 10 കിലോമീറ്റര്‍ അകലെയാണ് കെര്‍വ ഡാം. ഇവിടേയ്‌ക്ക് രാവിലെ ഏഴരയോടെ രണ്ട് പെണ്‍സുഹൃത്തുക്കള്‍ക്കൊപ്പം നടക്കാൻ പോയതായിരുന്നു സരള്‍. ഇതിലൊരാളുടെ നായ കെര്‍വ അണക്കെട്ടിലെ റിസര്‍വോയറില്‍ വീഴുകയായിരുന്നു. ഇതോടെ സരൾ വെള്ളത്തിലേയ്‌ക്ക് ചാടി. നായ നീന്തി രക്ഷപ്പെട്ടെങ്കിലും സരള്‍ മുങ്ങിത്താഴ്‌ന്നുവെന്നാണ് പൊലീസ് പറയുന്നത്.
