ഹൈദരാബാദ്:ഇന്ത്യ മുഴുവന്‍ ആരാധകരുള്ള ടെലിവിഷന്‍ റിയാലിറ്റി ഷോയാണ് ബിഗ്‌ബോസ്. മലയാളത്തിലടക്കം നിരവധി ഭാഷകളില്‍ സംപ്രേക്ഷണം ചെയ്യുന്ന പരിപാടി എല്ലാ ഭാഷകളിലും പല സീസണുകളും ഇതിനകം തന്നെ പിന്നിട്ടുകഴിഞ്ഞു.
ഇപ്പോഴിതാ ബിഗ്‌ബോസ് തെലുങ്കിന്റെ സംപ്രേക്ഷണം ആരംഭിച്ചിരിക്കുകയാണ് സ്റ്റാര്‍ മാ ടിവി. കഴിഞ്ഞ ദിവസമായിരുന്നു തെലുങ്ക് ബിഗ്‌ബോസിന്റെ ഏഴാം സീസണിന് തുടക്കമായത്.
14 മത്സരാര്‍ഥികള്‍ മാറ്റുരയ്ക്കുന്ന തെലുങ്ക് ബിഗ്‌ബോസില്‍ ദക്ഷിണേന്ത്യയാകെ സുപരിചിതയായ നടി ഷക്കീലയും ഇക്കുറി പങ്കെടുക്കുന്നുണ്ട്. ബിഗ്‌ബോസ് ഷോയിലെ അഞ്ചാമത്തെ മത്സരാര്‍ഥിയായാണ് താരത്തെ ബിഗ്‌ബോസ് അവതാരകന്‍ കൂടിയായ സൂപ്പര്‍ താരം നാഗാര്‍ജുന അക്കിനേനി പരിചയപ്പെടുത്തിയത്.
അതേസമയം താൻ ചെയ്ത വേഷങ്ങളില്‍ ഖേദമില്ലെന്നും തമിഴ്‌നാട്ടില്‍ 23 വര്‍ഷങ്ങള്‍ക്ക് മുൻപ് ഒരു റിയാലിറ്റി ഷോയില്‍ പങ്കെടുത്തതോടെയാണ് തമിഴ് സിനിമാരംഗത്തെ തന്റെ ഇമേജ് മാറിയതെന്നും തെലുങ്കിലും അത് സംഭവിക്കുമെന്ന് പ്രതീക്ഷിക്കുന്നതായും ഷക്കീല പറഞ്ഞു.
