കോഴിക്കോട്: ബീച്ച് ആശുപത്രിയിൽ ഹൗസ് സര്‍ജന്മാര്‍ തമ്മില്‍ ഏറ്റുമുട്ടി.
ഡ്യൂട്ടിക്ക് വൈകി വന്നതിനെ മറ്റൊരു ഹൗസ് സര്‍ജൻ ചോദ്യം ചെയ്തതാണ് വാക്കുതര്‍ക്കത്തിന് ഇടയായത്. അത്യാഹിത വിഭാഗത്തില്‍ രോഗികളുടെ മുൻപില്‍ തുടങ്ങിയ വാക്കേറ്റവും അടിപിടിയും ഹൗസ് സര്‍ജന്മാരുടെ മുറിയിലും തുടര്‍ന്നു.
അത്യാഹിത വിഭാഗത്തിലെ ഡ്യൂട്ടി ഡോക്ടര്‍ ഉള്‍പ്പെടെ എത്തിയാണ് രംഗം ശാന്തമാക്കിയത്. ശനിയാഴ്ച രാത്രി ഏഴോടെ തുടങ്ങിയ പ്രശ്നങ്ങള്‍ അരമണിക്കൂറോളം നീണ്ടു. അടിപിടിയെ തുടര്‍ന്നു ചികിത്സ വൈകിയതോടെ രോഗികളും അവരുടെ കൂട്ടിരിപ്പുകാരും ഡോക്ടർമാർക്കെതിരെ തിരിഞ്ഞു.
അതേസമയം സംഭവത്തെ കുറിച്ച്‌ അന്വേഷിക്കുമെന്നും രോഗികള്‍ക്ക് ചികിത്സ വൈകിയിട്ടില്ലെന്നും ആശുപത്രി അധികൃതര്‍ പറഞ്ഞു.
