കണ്ണൂര്‍: ഡ്യൂട്ടിക്കിടെ ദുരൂഹസാഹചര്യത്തില്‍ കാണാതായ തലശേരി ടൗണ്‍ പോലീസ് സ്റ്റേഷനിലെ സബ് ഇന്‍സ്‌പെക്ടറെ കുറിച്ചു വിവരം ലഭിക്കാതെ പോലീസ് ഇരുട്ടില്‍ തപ്പുന്നു. തിങ്കളാഴ്ച്ച രാവിലെ മുതലാണ് പേരാവൂര്‍ പുന്നപ്പാലം സ്വദേശിയായ എസ്.ഐ. ലിനേഷിനെ കാണാതായത്. രാവിലെ വയര്‍ലെസ് അറ്റന്‍ഡ് ചെയ്യാന്‍ എത്തേണ്ടിയിരുന്ന ഉദ്യോഗസ്ഥനായിരുന്നു ലിനേഷ്. സ്റ്റേഷനില്‍ നിന്ന് ഇതുസംബന്ധിച്ച വിവരങ്ങള്‍ ലിനേഷിനെ അതിരാവിലെ തന്നെ അറിയിക്കുകയും ചെയ്തിരുന്നു.
വയര്‍ലെസ് അറ്റന്‍ഡ് ചെയ്യാന്‍ രാവിലെ എട്ടിന് സ്റ്റേഷനിലെത്തേണ്ട ലിനേഷിനെ ദുരൂഹ സാഹചര്യത്തില്‍ കാണാതാകുകയായിരുന്നു. അന്നേ ദിവസം മണവാട്ടി ജംഗ്ഷനിലെ എടിഎമ്മില്‍ നിന്ന് ലിനേഷ് 2000 രൂപ പിന്‍വലിച്ചതായി കണ്ടെത്തിയിട്ടുണ്ട്. ഇന്ത്യന്‍ റിസര്‍വ് ബറ്റാലിയനില്‍ പത്തുവര്‍ഷം സേവനം അനുഷ്ഠിച്ച ശേഷമാണ് രണ്ടു വര്‍ഷം മുമ്പ് ഇദ്ദേഹം എസ്.ഐയായി കേരളാ പോലീസില്‍ എത്തിയത്. സ്റ്റേഷനിലെ ഉത്തരവാദിത്തങ്ങള്‍ താങ്ങാന്‍ സാധിക്കുന്നില്ലെന്ന് ലിനേഷ് വീട്ടുകാരോട് പറഞ്ഞിരുന്നതായും സൂചനയുണ്ട്.
കഴിഞ്ഞ രണ്ടു ദിവസമായി തലശേരി സ്റ്റേഷനില്‍ ജോലി ചെയ്തുവരികയായിരുന്നു. പോലീസ് ക്വാര്‍ട്ടേഴ്‌സിലാണ് ഇയാള്‍ താമസിച്ചുവന്നിരുന്നത്. ലിനേഷിനെ കണ്ടെത്താനുളള ഊര്‍ജ്ജിത ശ്രമത്തിലാണ് പോലീസ്. ജോലിയിലെ മാനസിക സമ്മര്‍ദ്ദമാണ് എസ്.ഐ. നാട്ടില്‍ നിന്ന് വിട്ടുനില്‍ക്കാന്‍ പ്രേരിപ്പിച്ചതെന്നാണ് പോലീസിന്റെ പ്രാഥമിക നിഗമനം. അതുകൊണ്ടുതന്നെ ഇയാള്‍ പോകാന്‍ സാധ്യതയുളള സുഹൃത്തുക്കളുടെ വീടുകള്‍, ബന്ധുവീടുകള്‍, തീര്‍ഥാടന കേന്ദ്രങ്ങള്‍ എന്നിവടങ്ങളില്‍ തെരച്ചില്‍ ശക്തമാക്കിയിട്ടുണ്ട്.
