ഫേക്ക് ഐഡിയിലൂടെ ഫേസ്ബുക്കിൽ കടുത്ത രാഷ്ട്രീയം പങ്ക് വച്ചിരുന്ന യുവാവ് ആത്മഹത്യ ചെയ്തു

@Beena Sunny എന്ന ഫേക്ക് ഐഡിയിലൂടെ കടുത്ത രാഷ്ട്രീയം പറഞ്ഞിരുന്ന ഉണ്ണി ഗോപാലകൃഷ്ണൻ ആണ് ജീവിതം അവസാനിപ്പിച്ചത്.അതേസമയം ആത്മഹത്യയുടെ കാരണം എന്തെന്ന് വ്യക്തമല്ല.

T C Rajesh Sindhu എന്നയാളുടെ പോസ്റ്റ് വായിക്കാം;

ബീന സണ്ണിയെ ഫെയ്‌സ് ബുക്കിലൂടെ മാത്രമേ അറിയുമായിരുന്നുള്ളു. ഒരുദിവസം മെസഞ്ചറിലൂടെ ബീന സണ്ണി തന്നെയാണ് എനിക്ക് ഉണ്ണിക്കൃഷ്ണനെ പരിചയപ്പെടുത്തിയത്. അയാളെ എനിക്ക് നേരിട്ട് അറിയുമായിരുന്നില്ല. ഒരിടത്ത് ഒരു ജോലിയുടെ ഒഴിവുണ്ടെന്നും അവിടേക്ക് ഇദ്ദേഹത്തെ റെക്കമന്റ് ചെയ്താൽ ആ സ്ഥാപനവും ഇയാളും ഒരുപോലെ രക്ഷപ്പെടുമെന്നുമായിരുന്നു പറഞ്ഞത്. അതിനുള്ള ബന്ധമൊന്നുമില്ലാത്തതിനാൽ പറ്റില്ലെന്നു പറഞ്ഞൊഴിഞ്ഞു.

പിന്നീട് ബീന സണ്ണി കളംനിറഞ്ഞ മറ്റൊരു വിവാദസമയത്ത് ചില മാധ്യമസുഹൃത്തുക്കൾ ഉണ്ണി ഗോപാലകൃഷ്ണനാണ് ബീന സണ്ണിയെന്നു പറഞ്ഞപ്പോഴാണ് ഞാൻ ആ റെക്കമെന്റേഷനെപ്പറ്റി ഓർത്തത്. ബീന സണ്ണിയോട് അന്ന് ഇത് നിങ്ങളാണോ എന്നു ചോദിച്ചപ്പോൾ മറുപടിയൊന്നും തന്നുമില്ല. കുറച്ചു ദിവസം മുൻപുവരെ പോസ്റ്റുകളിൽ റിയാക്ഷനുമായി വന്നിരുന്നു.കഴിഞ്ഞ ദിവസമാണ് ആള് ഐഡന്റിറ്റി  വെളിപ്പെടുത്തിയത്. ആ വെളിപ്പെടുത്തൽ ഒരു യാത്രാമൊഴിയായിരുന്നു എന്ന് ഇപ്പോഴാണ് മനസിലായത്.

തിരുവനന്തപുരം ഫോർട്ട്‌ മൂന്നാം തെരുവിലെ വീട്ടിൽ തൂങ്ങി മരിക്കുകയായിരുന്നു എന്നാണ് കിട്ടിയ വിവരം.

എന്തായാലും നടുക്കുന്ന, വിഷമിപ്പിക്കുന്ന ഒരു വാർത്തയായിപ്പോയി.