തൃശൂര്‍: ഓട്ടോറിക്ഷയ്ക്ക് തീപിടിച്ച് ഒരാള്‍ മരിച്ചു. തൃശൂര്‍ പെരിങ്ങാവ് ഗാന്ധിനഗര്‍ സ്ട്രീറ്റിലാണ് സംഭവം. പെരിങ്ങാവ് സ്വദേശി പ്രമോദ് ആണ് മരിച്ചതെന്ന് സംശയം. ഓട്ടോയ്ക്ക് എങ്ങനെ തീപിടിച്ചതെന്നത് വ്യക്തമല്ല. ശനിയാഴ്ച (ഇന്ന്) ഉച്ചയ്ക്ക് രണ്ടുമണിയോടെയാണ് സംഭവം.
നിര്‍ത്തിയിട്ടിരുന്ന ഓട്ടോയ്ക്കാണ് തീപിടിച്ചത്. സംഭവം ആദ്യം നാട്ടുകാരുടെ ശ്രദ്ധയിലാണ് പെട്ടത്. ഉടന്‍തന്നെ അഗ്‌നിരക്ഷാസേനയെ വിവരമറിയിച്ചു. തുടര്‍ന്ന്, അഗ്‌നിരക്ഷാസേനയെത്തി തീയണച്ചതോടെയാണ് ഓട്ടോയുടെ പിറകിലെ സീറ്റില്‍ കത്തിക്കരിഞ്ഞ നിലയില്‍ ഒരാളെ കണ്ടെത്തിയത്.
പുതിയ രജിസ്ട്രേഷനിലുള്ള സിഎന്‍ജി ഓട്ടോയ്ക്കാണ് തീപിടിച്ചതെന്ന് പോലീസ് പറഞ്ഞു. ഇത് പെരിങ്ങാവിലുള്ള ഓട്ടോയാണെന്നും പോലീസ് തിരിച്ചറിഞ്ഞിട്ടുണ്ട്. ഓട്ടോ ഡ്രൈവര്‍ ആരാണെന്നതടക്കം കണ്ടെത്താനായി പോലീസ് അന്വേഷണം തുടര്‍ന്നു.
