ഇടുക്കി: കട്ടപ്പനയില് ആത്മഹത്യ ചെയ്ത സാബുവിന്റെ ഫോണ് സന്ദേശം പുറത്ത്. സിപിഎം മുന് കട്ടപ്പന ഏരിയ സെക്രട്ടറിയും ബാങ്ക് മുന് പ്രസിഡന്റുമായ വി.ആര് സജിയുമായുള്ള സംഭാഷണമാണ് പുറത്ത് വന്നത്. പണം ചോദിച്ചെത്തിയപ്പോള് ബാങ്ക് ജീവനക്കാരന് ബിനോയ് പിടിച്ചു തള്ളിയെന്നും താന് തിരിച്ച് ആക്രമിച്ചെന്ന് പറഞ്ഞ് പ്രശ്നം ഉണ്ടാക്കുകയാണെന്നും സാബു സജിയോടു പറഞ്ഞു. നിങ്ങള് അടി വാങ്ങിക്കേണ്ട സമയം കഴിഞ്ഞുവെന്നായിരുന്നും സജിയുടെ പ്രതികരണം. പണി മനസിലാക്കി തരാമെന്നും സജി സാബുവിനെ ഭീഷണിപ്പെടുത്തുന്നുണ്ട്.
സിപിഎം നിയന്ത്രണത്തിലുള്ള കട്ടപ്പന റൂറല് ഡെവലപ്മെന്റ് കോ ഓപ്പറേറ്റീവ് സൊസൈറ്റിക്ക് മുന്നിലാണ് സാബുവിനെ മരിച്ച നിലയില് കണ്ടത്. നിക്ഷേപ തുക തിരികെ ആവശ്യപ്പെട്ട് സാബു വ്യാഴാഴ്ച ബാങ്കില് എത്തിയിരുന്നു. സാബുവിന് 25 ലക്ഷത്തോളം രൂപ നിക്ഷേപമുണ്ടെന്നാണ് വിവരം. ഭാര്യയുടെ ചികില്സാര്ത്ഥം പണം ആവശ്യപ്പെട്ടെത്തിയ സാബുവിനെ ജീവനക്കാര് അപമാനിച്ചിറക്കി വിട്ടെന്ന പരാമര്ശം ആത്മഹത്യാക്കുറിപ്പിലുമുണ്ട്. സംഭവത്തിന് പിന്നാലെ പ്രതിഷേധവുമായി ബിജെപി- കോണ്ഗ്രസ് പ്രവര്ത്തകര് രംഗത്തെത്തിയിരുന്നു. എന്നാല് സാമ്പത്തിക പ്രതിസന്ധിയുണ്ടെന്നും നിക്ഷേപകര്ക്ക് ഘട്ടം ഘട്ടമായി പണം നല്കുന്നുണ്ടെന്നുമാണ് ബാങ്കധികൃതരുടെ വിശദീകരണം.
അതേസമയം സംഭവത്തില് ബാങ്ക് ജീവനക്കാരെ ഇന്ന് ചോദ്യം ചെയ്തേക്കും. ആത്മഹത്യാ കുറിപ്പില് പേരുള്ള ബാങ്ക് സെക്രട്ടറി റെജി, ജീവനക്കാരായ ബിനോയി, സുജ മോള് എന്നിവരുടെ മൊഴികളാണ് പൊലീസ് ആദ്യം രേഖപ്പെടുത്തുക. ബാങ്കുമായി ബന്ധപ്പെട്ടവര് സാബുവിനെ ഫോണിലൂടെ ഭീഷണിപ്പെടുത്തിയെന്ന ബന്ധുവിന്റെ ആരോപണവും പരിശോധിക്കും. സാബു ബാങ്കില് എത്തിയ സമയത്തെ സിസി ടിവി ദൃശ്യങ്ങളും പൊലീസ് ശേഖരിച്ചിട്ടുണ്ട്.
പോസ്റ്റ്മോര്ട്ടം നടപടികള് പൂര്ത്തിയാക്കിയ ശേഷം സാബുവിന്റെ മൃതദേഹം കട്ടപ്പനയിലെ സ്വകാര്യ ആശുപത്രിയിലെ മോര്ച്ചറിയില് സൂക്ഷിച്ചിരിക്കുകയാണ്. വിദേശത്തുനിന്ന് ബന്ധുക്കള് വന്നതിനുശേഷമാകും സംസ്കാരം. കുറ്റക്കാര്ക്കെതിരെ നടപടിയെടുത്തില്ലെങ്കില് പ്രതിഷേധം ശക്തമാക്കുമെന്നാണ് കോണ്ഗ്രസിന്റെയും ബിജെപിയുടെയും തീരുമാനം. അതിനിടെ സാബുവിന്റെ കുടുംബത്തോടൊപ്പമാണെന്ന് ബാങ്ക് ഭരണസമിതി വാര്ത്താക്കുറിപ്പില് അറിയിച്ചു.
