ഇന്ത്യന് കയറ്റുമതി രംഗത്തെ താരമായി ബീഫ്; ബീഫ് കയറ്റുമതിയില് ഇന്ത്യയ്ക്ക് വന് കുതിപ്പ്: വരുമാനം 34,177കോടി; ലോകത്തിലെ രണ്ടാമത്തെ വലിയ ബീഫ് കയറ്റുമതി രാജ്യം; മൊത്തം കയറ്റുമതിയുടെ സിംഹഭാഗവും സംഭാവന ചെയ്യുന്നത് യോഗിയുടെ യുപി
ലക്നൗ: ആരൊക്കെ എന്തൊക്കെ പറഞ്ഞാലും ആരെല്ലാം വാളെടുത്താലും ഇന്ത്യന് കയറ്റുമതി രംഗത്തെ താരമായിരിക്കുകയാണ് ബീഫ്. ബീഫിനെ ചൊല്ലി ഇന്ത്യയിലെ പല സംസ്ഥാനങ്ങളിലും പ്രശ്നങ്ങള് നടക്കുന്നതിനിടയിലും ആഗോള ബീഫ് വിപണിയില് ഇന്ത്യന് ബീഫിന് ഡിമാന്റ് കുത്തനെ വര്ധിച്ചിരിക്കുന്നു.
ബീഫ് കയറ്റുമതിയില് ഇന്ത്യ വന്കുതിച്ചുചാട്ടമാണ് നടത്തിയിരിക്കുന്നത്. ബീഫ് കയറ്റുമതിയിലൂടെ ഇന്ത്യയ്ക്ക് കിട്ടിയ വരുമാനം എത്രയെന്നറിയാമോ 34,177 കോടി രൂപ.
ആഗോള ബീഫ് വിപണിയില് പരമ്പരാഗത കുത്തകരാജ്യങ്ങളെ പിന്നിലാക്കിയാണ് ഇന്ത്യ ഈ മുന്നേറ്റം നടത്തിയിരിക്കുന്നത്. നിലവില് ലോകത്തെ രണ്ടാമത്തെ വലിയ ബീഫ് കയറ്റുമതി രാജ്യമായി ഇന്ത്യ മാറി. പ്രതിവര്ഷം 380 കോടി ഡോളറിന്റെ അതായത് ഏകദേശം 34,177 കോടി രൂപയാണ് ബീഫ് കയറ്റുമതിയിലൂടെ ഇന്ത്യ സ്വന്തമാക്കുന്നത്.
രാജ്യത്തെ മൊത്തം ബീഫ് കയറ്റുമതിയുടെ സിംഹഭാഗവും സംഭാവന ചെയ്യുന്നത് യോഗി ആദിത്യനാഥ് ഭരിക്കുന്ന ഉത്തര്പ്രദേശാണ്. കയറ്റുമതിയുടെ 60 ശതമാനവും യുപിയില് നിന്നാണ്. ഉത്തര്പ്രദേശ് കഴിഞ്ഞാല് മഹാരാഷ്ട്ര, പഞ്ചാബ്, ആന്ധ്രാപ്രദേശ് തുടങ്ങിയ സംസ്ഥാനങ്ങളാണ് തൊട്ടുപിന്നിലുള്ളത്.
തെക്കുകിഴക്കന് ഏഷ്യയും മിഡില് ഈസ്റ്റ് രാജ്യങ്ങളുമാണ് ഇന്ത്യയുടെ പ്രധാന ബീഫ് വിപണികള്. വിയറ്റ്നാം, മലേഷ്യ, യുഎഇ, സൗദി അറേബ്യ, ഈജിപ്ത്, ഇറാഖ് തുടങ്ങിയ രാജ്യങ്ങളിലേക്കാണ് പ്രധാനമായും മാംസം കയറ്റുമതി ചെയ്യുന്നത്. അല്ലാനസണ്സ് പ്രൈവറ്റ് ലിമിറ്റഡ്, ഫെയര് എക്സ്പോര്ട്ട്സ്, അല് ഹംദ് അഗ്രോ, മിര്ഹ എക്സ്പോര്ട്ട്സ്, എച്ച്എംഎ അഗ്രോ, അല് ഫഹീം മീറ്റക്സ് എന്നിവരാണ് രാജ്യത്തെ പ്രധാന കയറ്റുമതിക്കാര്. കേന്ദ്ര സര്ക്കാരിന്റെ കണക്കുകള് പ്രകാരം ഇന്ത്യയില് നിന്ന് കയറ്റുമതി ചെയ്യുന്ന ബീഫില് ഭൂരിഭാഗവും എരുമ മാംസമാണ്.
ബീഫ് കഴിച്ചതിന്റെയും കൈവശം വെച്ചതിന്റെയും പേരില് ഇന്ത്യയിലെ പല സംസ്ഥാനങ്ങളിലും വര്ഗീയ സംഭവ വികാസങ്ങളും അക്രമങ്ങളും അരങ്ങേറുന്നതിനിടെയാണ് ബീഫ് കയറ്റുമതിയില് ഇന്ത്യയുടെ ഈ കുതിച്ചുചാട്ടം. നരേന്ദ്രമോദി സര്ക്കാര് അധികാരത്തിലേറിയ ശേഷമാണ് ഈ കുതിച്ചുചാട്ടം എന്നതും ശ്രദ്ധേയമാണ്.
