Local

കണ്ണൂർ പള്ളിയാന്‍മൂലയില്‍ സംഘര്‍ഷം, മൂന്നുപേർക്ക് വെട്ടേറ്റു, ഒരാളുടെ നില ഗുരുതരം: ലോകകപ്പ് മത്സരത്തിൽ ഫ്രാന്‍സ് ആരാധകരെ കളിയാക്കിയതാണ് സംഘർഷ കാരണം

  ഫ്രഞ്ചു പടയെ തുരത്തി അര്‍ജന്റീനയുടെ മെസിയും സംഘവും ലോകകപ്പില്‍ മുത്തമിട്ട നിമിഷം ലോകമാകെയുള്ള ഫുട്‌ബോള്‍ പ്രേമികൾ ആവേശത്തിൻ്റെ പാരമ്യത്തിലെത്തി. ഈ ആഹ്‌ളാദ പ്രകടനത്തിനിടെ കണ്ണൂര്‍ പള്ളിയാന്‍മൂലയില്‍ സംഘര്‍ഷം ഉടലെടുത്തു. ഫ്രാന്‍സ് ആരാധകരെ ഒരുസംഘം കളിയാക്കിയതാണ് സംഘര്‍ഷ കാരണം. മൂന്നുപേര്‍ക്ക് വെട്ടേറ്റു. ഒരാളുടെ പരിക്ക് ഗുരുതരമാണ്. അനുരാഗ്, ആദര്‍ശ്, അലക്‌സ് ആന്റണി എന്നിവര്‍ക്കാണ് പരിക്കേറ്റത്. ഇതില്‍ അനുരാഗ് ഗുരുതരാവസ്ഥയിലാണ്.. സംഘര്‍ഷത്തില്‍ ആറുപേരെ കസ്റ്റഡിയില്‍ എടുത്തു. സ്വകാര്യ ആശുപത്രികളിലാണ് പരിക്കേറ്റ മൂന്നുപേരെയും  പ്രവേശിപ്പിച്ചിരിക്കുന്നത്. തിങ്കളാഴ്ച പുലര്‍ച്ചെ 12.40 ഓടെയായിരുന്നു സംഭവം നേരത്തെ ലോകകപ്പ് മത്സരത്തില്‍ ബ്രസീല്‍ തോറ്റപ്പോഴും ഇതേ സ്ഥലത്ത് സംഘര്‍ഷമുണ്ടായിരുന്നു. എന്നാല്‍ അന്ന് സംഘർഷം അതിരുവിടുകയോ ആര്‍ക്കും പരിക്കേൽക്കുകയോ  ചെയ്തില്ല. ഇത്തവണ ആദ്യം വാക്കേറ്റമുണ്ടാവുകയും പിന്നീട് സംഘര്‍ഷത്തിലേക്കും ആക്രമണത്തിലേക്കും കടക്കുകയുമായിരുന്നു. ഉടന്‍തന്നെ പൊലീസ് എത്തി പരിക്കേറ്റവരെ ആശുപത്രിയില്‍ എത്തിച്ചു. ഫ്രാന്‍സ്- അര്‍ജന്റീന മത്സരത്തിന് പിന്നാലെ ഫ്രാന്‍സ് ആരാധകരെ ഒരുസംഘം കളിയാക്കുകയതോടെയാണ് പ്രശ്‌നങ്ങള്‍ക്ക് തുടക്കമായത്. ഇവര്‍ ലഹരി ഉപയോഗിച്ചിരുന്നോ എന്ന് പൊലീസ് അന്വേഷിക്കുന്നുണ്ട്.