തിരുവനന്തപുരം: വടക്കന്‍ ആന്‍ഡമാന്‍ കടലിനു മുകളില്‍ രൂപപ്പെട്ട ന്യൂനമര്‍ദം, വടക്ക് കിഴക്കന്‍ ബംഗാള്‍ ഉള്‍ക്കടലിലും മധ്യകിഴക്കന്‍ ബംഗാള്‍ ഉള്‍ക്കടലിനു മുകളിലും തീവ്രന്യൂനമര്‍ദമായി ശക്തി പ്രാപിച്ചു. നാളെ (ഞായര്‍) രാവിലെയോടെ അതിതീവ്രന്യൂനമര്‍ദ്ദമായി ശക്തി പ്രാപിക്കും.
തുടര്‍ന്ന് വടക്ക്- വടക്ക് കിഴക്ക് ഭാഗത്തേക്ക് തിരിഞ്ഞ് 24 ന് രാവിലെ മധ്യ ബംഗാള്‍ ഉള്‍ക്കടലില്‍ ചുഴലിക്കാറ്റായി മാറാനാണു സാധ്യത. തുടര്‍ന്ന് വടക്ക് -വടക്ക് കിഴക്ക് ദിശയില്‍ നീങ്ങി 25 ന് രാവിലെ ബംഗ്ലദേശ് തീരത്തു ടിങ്കൊണ ദ്വീപിനും സാന്‍ഡ് വൈപിനുമിടയില്‍ കരയില്‍ പ്രവേശിക്കാനാണു സാധ്യതയെന്നു കേന്ദ്ര കാലാവസ്ഥ വകുപ്പ് അറിയിച്ചു.
ഇതിന്റെ ഫലമായി സംസ്ഥാനത്ത് ഇന്ന് (ശനി) വ്യാപകമായ മഴയ്ക്കു സാധ്യതയുണ്ട്. ഒറ്റപ്പെട്ട സ്ഥലങ്ങളില്‍ ശക്തമായ മഴയും ഇടിമിന്നലും അനുഭവപ്പെട്ടേക്കും.
