സ്ത്രീകളുടെ രക്തം പുരണ്ട അടിവസ്ത്രങ്ങളുമായി ബീഹാര് യുവാവ്, പൊലീസ് അന്വേഷണം തുടങ്ങി
കോഴിക്കോട്: ബാലുശേരി കിനാലൂരില് പരിക്കേറ്റ നിലയില് ബീഹാര് സ്വദേശിയെ നാട്ടുകാര് പിടികൂടി. രക്തം പുരണ്ട നിലയില് സ്ത്രീകളുടെ അടിവസ്ത്രങ്ങളും ഒരു ഷൂവും ഇയാളുടെ പക്കല് നിന്ന് കണ്ടെടുത്തു. ഇന്നുരാവിലെയാണ് സംഭവം.
കിനാലൂര് പാറത്തലയ്ക്കല് ബാബുരാജിന്റെ വീടിന്റെ പിന്വശത്താണ് ബീഹാര് സ്വദേശിയായ യുവാവ് കിടക്കുന്നതായി കണ്ടത്. തലയില് മുറിവുണ്ടായിരുന്നു. രാവിലെ ആറുമണിയോടെ വീട്ടുകാര് വാതില് തുറന്ന് പുറത്തിറങ്ങിയപ്പോഴാണ് ഇയാളെ കണ്ടത്. കയ്യില് അടിവസ്ത്രങ്ങളും ഷൂസും ഉണ്ടായിരുന്നു. ഇയാള് കഴിഞ്ഞദിവസം മദ്യപിച്ചിരുന്നതായാണ് വിവരം. ശേഷം താമസസ്ഥലത്തേയ്ക്ക് പോകുന്നതിനിടെ എവിടെയെങ്കിലും വീണ് പരിക്കേല്ക്കുകയും പരിസരത്തുകണ്ട വസ്ത്രങ്ങള് എടുത്ത് മുറിവ് തുടയ്ക്കാന് ശ്രമിച്ചതാകാമെന്നുമാണ് പൊലീസിന്റെ നിഗമനം.
നിലവില് പ്രദേശത്ത് ആരെങ്കിലും കൊല്ലപ്പെട്ടതായോ കാണാതായതായോ ആര്ക്കെങ്കിലും പരിക്കേറ്റതായോ ഉള്ള വിവരം ലഭിച്ചിട്ടില്ല. യുവാവിനെ താലൂക്ക് ആശുപത്രിയിലേയ്ക്ക് മാറ്റി. മുറിവ് ആയുധം ഉപയോഗിച്ചുണ്ടായതല്ല എന്നാണ് പൊലീസിന്റെ അനുമാനം. സംഭവത്തില് പൊലീസ് അന്വേഷണം ആരംഭിച്ചു.
