ഫെയ്സ്ബുക്കില് പോസ്റ്റിട്ട് ആട് വില്പന; വീട്ടമ്മയെ പീഡിപ്പിച്ച് ഗര്ഭിണിയാക്കി മുങ്ങി, പ്രതി പിടിയില്
പത്തനംതിട്ട: ആടിനെ വില്ക്കാനുണ്ടെന്ന ഫെയ്സ് ബുക്ക് പോസ്റ്റ് കണ്ട് ബന്ധപ്പെട്ട വീട്ടമ്മയെ പീഡിപ്പിച്ച് ഗര്ഭിണിയാക്കി മുങ്ങിയ യുവാവ് അറസ്റ്റില്. കണ്ണൂര് തളിപ്പറമ്പ് എരുവേശി തുരുത്തേല് വീട്ടില് അഖില് അശോകനെ(27) ആണ് അടൂര് പോലീസ് അറസ്റ്റുചെയ്തത്. കഴിഞ്ഞ മേയിലാണ് സംഭവം. രണ്ടു കുട്ടികളുള്ള യുവതിയുടെ ഭര്ത്താവ് മരിച്ചതാണ്.
ഫെയ്സ്ബുക്കില് അഖില് അശോകന് ആടുവില്പ്പനയുമായി ബന്ധപ്പെട്ട് തന്റെ നമ്പരോടുകൂടി ഒരു പോസ്റ്റിട്ടിരുന്നു. ഇതു കണ്ട യുവതി ഈ നമ്പരില് ബന്ധപ്പെട്ടു. ഇത് പരിചയമായി മാറി. വിവാഹം ചെയ്തുകൊള്ളാമെന്ന് പറഞ്ഞ് വിശ്വസിപ്പിച്ച അഖില് അടൂരിലെത്തി യുവതിയെ ലൈംഗികമായി പീഡിപ്പിക്കുകയായിരുന്നുവെന്ന് പോലീസ് പറയുന്നു. ഇതിനിടയില് യുവതി ഗര്ഭിണിയായി. ഗര്ഭനിരോധിത ഗുളികകള് യുവതിക്ക് നല്കി ഗര്ഭം അലസിപ്പിക്കാന് ശ്രമിച്ചു. എന്നാല് വിജയിച്ചില്ല. ഇതോടെ അഖില് കടന്നുകളയുകയായിരുന്നു.
യുവതി അടൂര് പോലീസില് നല്കിയ പരാതിയുടെ അടിസ്ഥാനത്തില് അടൂര് ഡിവൈഎസ്പി ജി. സന്തോഷ് കുമാര്, എസ്എച്ച്ഒ ശ്യാം മുരളി, എസ്ഐമാരായ സുനില് കുമാര്, രാധാകൃഷ്ണന്, എസ്സിപിഒ ശ്രീജിത്ത്, സിപിഒമാരായ എസ്.ഒ. ശ്യാംകുമാര്, ആര്. രാജഗോപാല്, രാഹുല് ജയപ്രകാശ് എന്നിവര് ചേര്ന്നാണ് അഖില് അശോകനെ അറസ്റ്റുചെയ്തത്. നിലവില് ഗര്ഭസ്ഥ ശിശുവിന്റെ അവസ്ഥ മോശമായതിനാല് യുവതിയെ ആശുപത്രിയില് പ്രവേശിപ്പിച്ചിരിക്കുകയാണ്.
