കണ്ണൂര്: എഡിഎം നവീന് ബാബു കൈക്കൂലി വാങ്ങിയതിന് തെളിവില്ലെന്ന് വിജിലന്സ്. പ്രാഥമിക അന്വേഷണത്തിലാണ് കണ്ടെത്തല്. മൊഴിക്കപ്പുറം തെളിവ് ഹാജരാക്കാന് പരാതിക്കാരനായ പ്രശാന്തിന് കഴിഞ്ഞില്ലെന്നും വിജിലന്സ്. വിജിലന്സ് അടുത്ത ആഴ്ച റിപ്പോര്ട്ട് നല്കും.
എഡിഎം നവീന് ബാബുവിന് കൈക്കൂലി കൊടുത്തുവെന്ന പ്രശാന്തിന്റെ മൊഴിക്കപ്പുറം തെളിവില്ലെന്നാണ് വിജിലന്സ് കണ്ടെത്തിയിരിക്കുന്നത്. തെളിവ് ഹാജരാക്കാന് പ്രശാന്തിനും കഴിഞ്ഞില്ലെന്ന് വിജിലന്സ് റിപ്പോര്ട്ടില് പറയുന്നു. കോഴിക്കോട് വിജിലന്സ് സ്പെഷ്യല് സെല് എസ്പിയാണ് അന്വേഷണം നടത്തിയത്.
പെട്രോള് പമ്പിന് അനുമതി നല്കുന്നതിനായി കൈക്കൂലി നല്കിയെന്നായിരുന്നു പെട്രോള് പമ്പിന്റെ അപേക്ഷകനായിരുന്ന പ്രശാന്തിന്റെ ആരോപണം. സംഭവത്തില് കൈക്കൂലി ഇടപാട് നടന്നിട്ടുണ്ടോയെന്ന് പരിശോധിക്കാനായിരുന്നു വിജിലന്സ് സ്പെഷല് സെല്ലിന് സര്ക്കാര് നിര്ദേശം നല്കിയിരുന്നത്.
നവീന് ബാബുവിനെ കണ്ണൂരിലെ താമസസ്ഥലത്താണ് മരിച്ച നിലയില് കണ്ടെത്തിയത്. കളക്ടറേറ്റില് എഡിഎമ്മിന് നല്കിയ യാത്രയയപ്പില് കണ്ണൂര് ജില്ലാ പഞ്ചായത്ത് പ്രസിഡന്റായിരുന്ന പി.പി.ദിവ്യ എഡിഎമ്മിനെതിരെ വിമര്ശനം ഉന്നയിച്ചിരുന്നു.
ഉദ്യോഗസ്ഥരുടെ മുന്നിലെത്തുന്ന ഓരോ ഫയലിലും ഓരോ ജീവിതങ്ങളാണെന്ന് ഓര്മിപ്പിച്ചാണ് ജില്ലാ പഞ്ചായത്ത് പ്രസിഡന്റ് വിമര്ശനം ഉന്നയിച്ചിരുന്നത്. ജില്ലാ പഞ്ചായത്ത് പ്രസിഡന്റിന്റെ വിമര്ശനം ചര്ച്ചയായതിന് പിന്നാലെയാണ് എഡിഎമ്മിനെ മരിച്ച നിലയില് കണ്ടെത്തിയത്.
