കോട്ടയം: ലോക്‌സഭ നിയോജക മണ്ഡലം യുഡിഎഫ് സ്ഥാനാര്‍ഥി അഡ്വ.കെ ഫ്രാന്‍സിസ് ജോര്‍ജ് പിറവം മണ്ഡലത്തിലെ വിവിധ പ്രദേശങ്ങള്‍ സന്ദര്‍ശിച്ചു. ദിനംപ്രതി ഉയരുന്ന കനത്ത ചൂട് വകവെയ്ക്കാതെ നൂറുകണക്കിന് ആളുകളാണ് സ്ഥാനാര്‍ഥിയെ കാണാനായി പാതയോരങ്ങളില്‍ കാത്തു നിന്നത്.
രാവിലെ കൂത്താട്ടുകുളം രാജീവ് സ്‌ക്വയറില്‍ എത്തിയപ്പോള്‍ വന്‍ ജനാവലിയാണ് സ്ഥാനാര്‍ഥിയെ കാണാനും ആശംസകള്‍ അറിയിക്കാനും എത്തിയത്. പുഷ്പാര്‍ച്ചനയ്ക്ക് ശേഷം വോട്ടര്‍മാരെ അഭിസംബോധന ചെയ്ത് സംസാരിച്ചു. ഉച്ചയ്ക്ക് ശേഷം ഇയൊറിലെ മീറ്റ് പ്രൊഡക്ട് ഓഫ് ഇന്ത്യയിലെ ജീവനക്കാരെ സന്ദര്‍ശിച്ചു. കുശലാന്വേഷണങ്ങള്‍ക്ക് ശേഷം വോട്ട് അഭ്യര്‍ഥിച്ചിട്ടാണ് സ്ഥാനാര്‍ഥി മടങ്ങിയത്.
തുടര്‍ന്ന് കാഞ്ഞിരമറ്റം ശൈഖ് ഫരീദുദ്ദീന്‍ ജുമാ മസ്ജിദ് സന്ദര്‍ശിക്കുകയും വെള്ളിയാഴ്ച ജുമാ പ്രാര്‍ത്ഥനയ്ക്ക് ശേഷം വിശ്വാസികളെ നേരിട്ടു കാണുകയും ചെയ്തു. നിലവിലെ രാഷ്ട്രീയ സാഹചര്യങ്ങളില്‍ യുഡിഎഫിന് അനുകൂലമായ സാഹചര്യം സൃഷ്ടിക്കണമെന്ന് സ്ഥാനാര്‍ഥി പറഞ്ഞു. ശേഷം വടകര കത്തോലിക്കാ പള്ളിയിലെ കുരിശിന്റെ വഴിയില്‍ പങ്കെടുത്തു. ചടങ്ങിനെത്തിയ വിശ്വാസികളോട് സ്‌നേഹ സംഭാഷണം നടത്തിയ ശേഷമാണ് അദ്ദേഹം മടങ്ങിയത്.
മേരിഗിരി സി എം ഐ ആശ്രമം, കൂത്താട്ടുകുളം ടൗണ്‍ യൂദാശ്ലീഹാ പള്ളി, ദേവമാതാ ആശുപത്രി, ദേവമാതാ ആശ്രമം എന്നിവടങ്ങളില്‍ സന്ദര്‍ശനം നടത്തി. ശ്രീധരീയം ആശുപത്രിയിലെത്തിയ സ്ഥാനാര്‍ഥി ശ്രീധരീയം ഗ്രൂപ്പ് ചെയര്‍മാന്‍ എന്‍ പി നാരായണന്‍ നമ്പൂതിരി കണ്ട് ആശിര്‍വാദം ഏറ്റുവാങ്ങി. വടകര സാന്തുല ട്രസ്റ്റ് ആശുപത്രി ,അഡറേഷന്‍ കോണ്‍വെന്റ് എന്നിവടങ്ങളിലും വൈകുന്നേരം സന്ദര്‍ശനം നടത്തി. കോണ്‍വെന്റിലെത്തിയ സ്ഥാനാര്‍ഥി സിസ്റ്റര്‍മാരെ കാണുകയും വോട്ട് അഭ്യര്‍ഥിക്കുകയും ചെയ്തു.
യു ഡി എഫ് സ്ഥാനാര്‍ഥിയുടെ മണ്ഡല പര്യടനങ്ങളുടെ തുടക്കം തന്നെ ഏറെ ആവേശത്തോടെയാണ് വോട്ടര്‍മ്മാര്‍ വരവേറ്റത്. ജനങ്ങളുടെ ആവേശം തങ്ങള്‍ക്ക് ഏറെ വിജയ പ്രതീക്ഷ നല്‍കുന്നതാണെന്ന് സ്ഥാനാര്‍ഥി പറഞ്ഞു.
പര്യടനത്തില്‍ സ്ഥാനാര്‍ഥിയോടൊപ്പം പിറവം എംഎല്‍എ അനൂപ് ജേക്കബ്, കൂത്താട്ടുകുളം മണ്ഡലം പ്രസിഡന്റ് റെജി ജോണ്‍, യുഡിഎഫ് കൂത്താട്ടുകുളം ചെയര്‍മാന്‍ പ്രിന്‍സ് പോള്‍ ജോണ്‍, കേരള കോണ്‍ഗ്രസ് മണ്ഡലം പ്രസിഡന്റ് ബേബി കീരാംതടം, ഭാസ്‌കരന്‍ പിസി, ഷാജി എംഎ തുടങ്ങിയവര്‍ പങ്കെടുത്തു.
