ഇടുക്കി: വാഹന വില്പനയെ തുടര്‍ന്നുണ്ടായ തര്‍ക്കത്തില്‍ ഉപ്പുതറയിലെ രണ്ടുവാഹന കച്ചവടക്കാരെ ഒരുസംഘമാളുകള്‍ ആക്രമിച്ച് പരിക്കേല്‍പ്പിച്ചു. ഉപ്പുതറ മാട്ടുത്താവളം മാണിക്കത്ത് രതീഷ് രാജന്‍ (33), മേരികുളം ആരംപുളിക്കല്‍ എഎസ് അന്‍സാരി (40) എന്നിവര്‍ക്കാണ് പരിക്കേറ്റത്. സംഭവത്തില്‍ ചീന്തലാര്‍ മൂന്നാം ഡിവിഷന്‍ സ്വദേശികളായ ജെഫ്രി, പ്രവീണ്‍, പ്രണവ്, ആരോമല്‍, കെസല്‍, വിഷ്ണു എന്നിവര്‍ക്കെതിരെ ഉപ്പുതറ പോലീസ് കേസെടുത്തു.
അന്‍സാരിയും രതീഷും കട്ടപ്പനയ്ക്ക് പോകാനായി പാലം ജങ്ഷനില്‍ നില്‍ക്കുന്നതിനിടെ ഓട്ടോറിക്ഷയില്‍ എത്തിയ സംഘം വാക്കത്തി കൊണ്ട് ആക്രമിക്കുകയായിരുന്നു. നാട്ടുകാര്‍ ഓടിയെത്തിയതോടെ അക്രമികള്‍ വാഹനത്തില്‍ രക്ഷപ്പെട്ടു. പരിക്കേറ്റ ഇരുവരെയും ഉപ്പുതറ സിഎച്ച്സിയില്‍ പ്രവേശിപ്പിച്ചു. വാക്കത്തി കൊണ്ട് തലയ്ക്ക് വെട്ടേറ്റ രതീഷിനെ കട്ടപ്പനയിലെ സ്വകാര്യ ആശുപത്രിയിലേക്ക് മാറ്റി. ഉപ്പുതറ പോലീസ് കേസെടുത്ത് അന്വേഷണം തുടങ്ങി.
ചൊവ്വ രാവിലെ 10.30 ഓടെ ഉപ്പുതറ പാലം ജങ്ഷനിലാണ് സംഭവം. അന്‍സാരിയും രതീഷും നാലുമാസം മുമ്പ് പ്രതികളിലൊരാളായ ജെഫ്രിക്ക് ഓട്ടോറിക്ഷ വിറ്റിരുന്നു. എന്നാല്‍, ഉടമസ്ഥാവകാശം ഇയാളുടെ പേരിലേക്ക് മാറ്റിയിരുന്നില്ല. മറ്റൊരാള്‍ ഇതേ ഓട്ടോറിക്ഷ വീണ്ടും കച്ചവടം ചെയ്യാന്‍ അന്‍സാരിയേയും രതീഷിനെയും സമീപിച്ചു. അപ്പോഴാണ് വണ്ടിയുടെ ഉടമസ്ഥാവകാശം മാറ്റിയിട്ടില്ലെന്ന വിവരമറിയുന്നത്. ഇതേച്ചൊല്ലിയുണ്ടായ തര്‍ക്കമാണ് അക്രമത്തില്‍ കലാശിച്ചത്.
