ആലപ്പുഴ: ഹൗസ് ബോട്ടില്‍നിന്നു കായലില്‍ വീണു കാണാതായ കോയമ്പത്തൂര്‍ സ്വദേശിയുടെ മൃതദേഹം കണ്ടെത്തി. അഗ്‌നിരക്ഷ സേനയുടെ സ്‌കൂബ സംഘം നടത്തിയ തിരച്ചിലിനൊടുവില്‍ ഇന്നു രാവിലെ 9.30ഓടെ ആണ് മൃതദേഹം കണ്ടെത്തിയത്.
തമിഴ്‌നാട്ടില്‍ നിന്നുള്ള 9 അംഗ ഉല്ലാസയാത്രാ സംഘത്തിലെ കോയമ്പത്തൂര്‍ പെരിയനായ്ക്കന്‍ പാളയം സ്വദേശി ദീപക്കിനെ (25) ഇന്നലെ രാത്രി ഒമ്പതിനാണ് തിരുമല ഭാര്‍ഗവന്‍ ജെട്ടിക്കു സമീപം നിര്‍ത്തിയിട്ടിരുന്ന ഹൗസ് ബോട്ടില്‍നിന്നു കായലില്‍ വീണു കാണാതായത്. ദീപക്കിനെ കാണാതായതിനെ തുടര്‍ന്ന് ശാരീരിക അസ്വസ്ഥത അനുഭവപ്പെട്ട സഹോദരി ദീപിക ആശുപത്രിയില്‍ ചികിത്സയിലാണ്.
ബന്ധുക്കള്‍ക്കൊപ്പമാണ് ദീപക്ക് വന്നത്. കോയമ്പത്തൂരില്‍ ബിസിനസ് നടത്തുകയാണ് ദീപക്ക്. അഗ്‌നിരക്ഷാ സേനയും ടൂറിസം പൊലീസും ഇന്നലെ രാത്രി സ്ഥലത്തെത്തി തിരച്ചില്‍ നടത്തിയെങ്കിലും കണ്ടെത്താന്‍ കഴിഞ്ഞിരുന്നില്ല.
