ചെന്നൈ: ഇന്നും നാളെയും ശക്തമായ മഴയുണ്ടാകുമെന്ന മുന്നറിയിപ്പിനെ തുടര്ന്ന് ആന്ധ്രാപ്രദേശ്, തമിഴ്നാട് തീരങ്ങളില് ജാഗ്രതാ നിര്ദേശമുണ്ട്. ബംഗാള് ഉള്ക്കടലില് രൂപപ്പെട്ട ന്യുനമര്ദം നാളെ പുലര്ച്ചയോടെ വടക്കന് തമിഴ്നാട് തീരം തൊടും. പുതുച്ചേരിയിലും ജാഗ്രതാ നിര്ദേശമുണ്ട്. ആന്ധ്രയുടെ തീരമേഖലയില് ശക്തമായ കാറ്റിനും സാധ്യതയുണ്ട്. മുന്കരുതല് നടപടികള് സ്വീകരിച്ചെന്നും ക്യാമ്പുകള് സജ്ജീകരിച്ചെന്നും സര്ക്കാരുകള് അറിയിച്ചു.
ചെന്നൈയില് പലയിടങ്ങളിലും വെള്ളക്കെട്ടുകളുമുണ്ടായ സാഹചര്യത്തില് അപകടസാധ്യത കൂടുതലാണെന്നും ജനങ്ങള് കഴിവതും പുറത്തിറങ്ങരുതെന്നും ഭരണകൂടം നിര്ദ്ദേശം നല്കി. ബൈക്ക് യാത്രകള് ഒഴിവാക്കാനും നിര്ദേശമുണ്ട്.
സംസ്ഥാനത്തെ 16 ജില്ലകളില് ഇന്ന് അവധിയാണ്. ചെന്നൈയിലെ 11 സബ് വേകള് അടച്ചു. 3 മണിക്കൂര് കൂടി കനത്ത മഴ തുടരും എന്നാണ് കാലാവസ്ഥാ വിഭാഗം നല്കുന്ന മുന്നറിയിപ്പ്. ട്രെയിന്, വിമാന സര്വീസുകള് വൈകി. തിരദേശ ജില്ലകളില് വ്യാപകമായി കൃഷി നാശമുണ്ടായി. കടലൂര് ജില്ലയിലാണ് കൂടുതല് നാശനഷ്ടങ്ങള് റിപ്പോര്ട്ട് ചെയ്തത്.
