ഗാര്ഹിക പീഡനമെന്ന് പറഞ്ഞപ്പോള് സഹതാപം തോന്നി, ലൈംഗിക ബന്ധം ഉഭയകക്ഷി സമ്മതപ്രകാരം ; ഗര്ഭഛിദ്രത്തിന് മരുന്ന് യുവതി കഴിച്ചത് സ്വന്തം തീരുമാനപ്രകാരമാണെ ന്നും രാഹുല് ; മൂന്കൂര് ജാമ്യഹര്ജി നല്കി
തിരുവനന്തപുരം: ലൈംഗികാപവാദക്കേസില് മുന്കൂര് ജാമ്യാപേക്ഷ സമര്പ്പിച്ച് രാഹുല് മാങ്കൂട്ടത്തില് എംഎല്എ. ഉഭയസമ്മത പ്രകാരമുളള ലൈംഗികബന്ധമാണ് ഉണ്ടായതെന്നും പെണ്കുട്ടി ഗര്ഭിണിയാണ് എന്ന ആരോപണം ശരിയല്ലെന്നും ബിജെപിയും സിപിഐഎമ്മും രാഷ്ട്രീയം കളിക്കുന്നെന്നും ശബരിമല സ്വര്ണ്ണക്കൊള്ള വിവാദം മറയ്ക്കാനുള്ള ശ്രമമെന്നും സമര്പ്പിച്ച ജാമ്യഹര്ജിയില് പറയുന്നു. തിരുവനന്തപുരം ജില്ലാ സെഷന്സ് കോടതിയിലാണ് ഹര്ജി നല്കിയിരിക്കുന്നത്.
യുവതിയുടെ പരാതി രാഷ്ട്രീയ പ്രേരിതമാണ് എന്നാണ് രാഹുല് മാങ്കൂട്ടത്തിലിന്റെ വാദം. പരാതിക്ക് പിന്നില് സിപി ഐഎമ്മും ബിജെപിയുമാണ്. പരാതിക്കാരി ഫേസ്ബുക്കിലൂടെ തന്നെയാണ് ആദ്യം ബന്ധപ്പെട്ടത്. ഗാര്ഹിക പീഡനത്തിന് ഇരയാകുന്നുവെന്ന് പരാതിക്കാരി തന്നോട് പറഞ്ഞു. തനിക്ക് അവരോട് സഹതാപം തോന്നി. തുടര്ന്ന് ഉഭയകക്ഷി സമ്മതപ്രകാരമുളള ലൈംഗിക ബന്ധത്തിലേക്ക് അത് വളര്ന്നു. ബന്ധത്തിലെ ശരിയും തെറ്റും തിരിച്ചറിയുന്നയാളാണ് യുവതി.
യുവതി ഗര്ഭിണിയായി എന്ന വാദം തെറ്റാണ് എന്നാണ് രാഹുല് മാങ്കൂട്ടത്തില് ജാമ്യഹര്ജിയില് വാദിക്കുന്നത്. ബന്ധത്തിലെ ഓരോ നിമിഷവും പരാതിക്കാരി റെക്കോര്ഡ് ചെയ്തെന്നും സന്ദേശങ്ങള് റെക്കോര്ഡ് ചെയ്തത് രാഷ്ട്രീയ ഗൂഢാലോചനയുടെ ഭാഗമായാണെന്നും രാഹുല് ഹര്ജിയില് പറയുന്നു. തന്നെ വ്യക്തിഹത്യ ചെയ്യാനുളള ശ്രമത്തിന്റെ ഭാഗമാണിതെന്നും മുഖ്യമന്ത്രിക്ക് നേരിട്ട് പരാതി നല്കിയത് രാഷ്ട്രീയ താല്പ്പര്യത്തിന്റെ ഭാഗമാണെന്നും രാഹുല് ജാമ്യഹര്ജിയില് പറയുന്നുണ്ട്.
‘ശബരിമല വിവാദം കത്തിനില്ക്കുന്ന സമയത്താണ് യുവതി പരാതി നല്കിയത്. സര്ക്കാരിനെ വിവാദത്തില് നിന്ന് രക്ഷിക്കാനാണ് യുവതി പരാതി നല്കിയിരിക്കുന്നത്. അവരുമായുണ്ടായത് ഉഭയകക്ഷി സമ്മതപ്രകാരമുളള ലൈംഗിക ബന്ധമാണ്. ഭര്ത്താവിനൊപ്പം കഴിയുന്ന സ്ത്രീയാണ് പരാതിക്കാരി. ഗര്ഭഛിദ്രത്തിന് മരുന്ന് യുവതി കഴിച്ചത് സ്വന്തം തീരുമാനപ്രകാരമാണ്. ഗര്ഭധാരണത്തിന്റെ ഉത്തരവാദിത്തം ഭര്ത്താവിന് തന്നെയാണ് എന്നും രാഹുല് മാങ്കൂട്ടത്തില് മുന്കൂര് ജാമ്യഹര്ജിയില് വാദിക്കുന്നു.
