പീഡനമേറ്റെന്ന കുറിപ്പെഴുതി അനന്തു അജിയുടെ ആത്മഹത്യ; ആര്എസ്എസ് പ്രവര്ത്തകന് പ്രതി; 15 പേജില് ആരോപണങ്ങള്; ഇന്സ്റ്റഗ്രാം വീഡിയോയിലും ഞെട്ടിക്കുന്ന വെളിപ്പെടുത്തലുകള്; ദുരനുഭവം കൂടുതല് ആര്എസ്എസ് ക്യാമ്പില്നിന്ന്
കോട്ടയം: കോട്ടയത്ത് പീഡനത്തിനിരയായി അനന്തു അജി എന്ന യുവാവ് ജീവനൊടുക്കിയ കേസില് ആര്എസ്എസ് പ്രവര്ത്തകന് നിതീഷ് മുരളീധരന് പ്രതി. അനന്തുവിന്റെ ഇന്സ്റ്റഗ്രാം വിഡിയോ മരണമൊഴിയായി രേഖപ്പെടുത്തിയാണ് തമ്പാനൂര് പൊലീസ് കേസെടുത്തത്. കേസ് പൊന്കുന്നം പൊലീസിന് കൈമാറും. നിതീഷ് മുരളീധരന് വാര്ഷങ്ങളോളം ലൈംഗികമായി പീഡിപ്പിച്ചെന്നാണ് പുറത്തുവന്ന വിഡിയോയില് പറയുന്നത്. ഇയാള്ക്കെതിരെ ഐപിസി 377 പ്രകാരമാണ് കേസെടുത്തത്.
ബുധനാഴ്ചയാണ് തമ്പാനൂരിലെ ഹോട്ടലില് അനന്തുവിന്റെ മൃതദേഹം കണ്ടത്. അനന്തുവിന്റെ ആരോപണം ഗുരുതരമാണെന്നും സംഭവത്തില് ശക്തമായ അന്വേഷണം വേണമെന്നും പ്രിയങ്ക ഗാന്ധി എംപി ആവശ്യപ്പെട്ടിരുന്നു. ശാഖയില് നടന്ന അതിക്രമങ്ങള് തനിക്കെതിരെ മാത്രമല്ല എന്ന അനന്തുവിന്റെ വെളിപ്പെടുത്തല് ഞെട്ടിക്കുന്നതാണെന്നും ആര്എസ്എസ് നേതൃത്വം സംഭവത്തില് ഉത്തരം പറയണമെന്നും പ്രിയങ്ക ഗാന്ധി പറഞ്ഞിരുന്നു.
ആര്എസ്എസ് പ്രവര്ത്തകര്ക്കെതിരെ ഇന്സ്റ്റഗ്രാമില് പോസ്റ്റ് പങ്കുവച്ച ശേഷമായിരുന്നു അനന്തു ജീവനൊടുക്കിയത്. മരണശേഷം പുറത്തു വരുന്ന രീതിയില് ഷെഡ്യൂള് ചെയ്താണ് അനന്തു പോസ്റ്റിട്ടത്. ആര്എസ്എസ് പ്രവര്ത്തകര്ക്കും സംഘടനയ്ക്കുമെതിരെയാണ് 15 പേജുകളിലായി അനന്തുവിന്റെ ആരോപണങ്ങള്. പിന്നാലെയാണ് ഇന്സ്റ്റഗ്രാമില് അനന്തു ഷെഡ്യൂള് ചെയ്ത വിഡിയോയും പുറത്ത് വന്നത്.
നാലു വയസ്സ് മുതല് പ്രകൃതിവിരുദ്ധ ലൈംഗിക പീഡനം ഏല്ക്കേണ്ടിവന്നെന്നും ആര്എസ്എസ് ക്യാംപില്നിന്നാണ് ദുരനുഭവങ്ങള് നേരിട്ടതെന്നും പോസ്റ്റില് പറയുന്നു. ഇതോടെ കടുത്ത വിഷാദരോഗത്തില് ബാധിച്ചു. അമ്മയെയും സഹോദരിയെയും ഓര്ത്താണ് ഇതുവരെ ഒന്നും ചെയ്യാതിരുന്നതെന്നും അനന്തുവിന്റെ വെളിപ്പെടുത്തലില് പറയുന്നു.
