ജയിലിലല്ല സ്കൂളിലാണ് നല്ല ഭക്ഷണം നല്കേണ്ടതെന്ന് കുഞ്ചാക്കോബോബന് ; സര്ക്കാര് സ്കൂളിലെ മെനു അറിയാന് നടനെ ഉച്ചഭക്ഷണത്തിന് ക്ഷണിച്ച് വിദ്യാഭ്യാസമന്ത്രിയുടെ പോസ്റ്റ്
തിരുവനന്തപുരം: മികച്ച ഭക്ഷണം ജയിലിലല്ല സ്കൂള് കുട്ടികള്ക്കാണ് നല്കേണ്ടതെന്ന പ്രസ്താവനയില് നടന് കുഞ്ചാക്കോബോബനെ ഉച്ചഭക്ഷണത്തിന് സര്ക്കാര്സ്കൂളിലേക്ക് ക്ഷണിച്ച് വിദ്യാഭ്യാസമന്ത്രി ശിവന്കുട്ടിയുടെ ഫേസ്ബുക്ക് കുറിപ്പ്. ഒരു സര്ക്കാര് സ്കൂളിലേക്ക് കുഞ്ചാക്കോബോബനെ സ്നേഹപൂര്വ്വം ക്ഷണിക്കുന്നെന്നും താനും വരാം കുട്ടികള്ക്കൊപ്പം ഒരുമിച്ചിരുന്ന് ഭക്ഷണം കഴിക്കാമെന്നാണ് കുറിപ്പ്.
തൃക്കാക്കര മണ്ഡലത്തിലെ സ്കൂള് കുട്ടികള്ക്കായി ഉമാ തോമസ് എംഎല്എ തുടങ്ങിയ പ്രഭാതഭക്ഷണ പദ്ധതി ഉദ്ഘാടനം ചെയ്തുകൊണ്ട് നടന് പറഞ്ഞ പ്രസ്താവനയാണ് മന്ത്രി ഏറ്റുപിടിച്ചത്. നമുക്കറിയാം ജയിലുകളിലാണ് ഇപ്പോള് കുറച്ചുകൂടി നല്ല ഭക്ഷണം കിട്ടുന്നത്. അതില് മാറ്റം വരണം. കുറ്റവാളികളെ വളര്ത്താനല്ല, കുറ്റമറ്റവരെ സംരക്ഷിക്കാനാണ് ഏത് സര്ക്കാരും ശ്രമിക്കേണ്ടത്. എന്നായിരുന്നു കുഞ്ചാക്കോ ബോബന്റെ വാക്കുകള്. വാര്ത്ത ശ്രദ്ധയില് പെട്ടതോടെയാണ് മന്ത്രി കുഞ്ചാക്കോ ബോബനെ ഉച്ചഭക്ഷണത്തിനായി സര്ക്കാര് സ്കൂളിലേക്ക് ക്ഷണിച്ചത്. സ്കൂള് ഉച്ച ഭക്ഷണത്തിന്റെ മെനുവും രുചിയും അറിയാമെന്നും അദ്ദേഹം ഫേസ്ബുക്കില് കുറിച്ചു.
മന്ത്രിയുടെ ഫേസ്ബുക്ക് കുറിപ്പ്
‘മികച്ച ഭക്ഷണം നല്കേണ്ടത് ജയിലിലല്ല, സ്കൂള് കുട്ടികള്ക്കാണ്- കുഞ്ചാക്കോ ബോബന്’
ഈ രൂപത്തിലുള്ള ഗ്രാഫിക്സ് കാര്ഡുകള് ആണ് ആദ്യം ശ്രദ്ധയില്പ്പെട്ടത്. എന്താണ് ചാക്കോച്ചന് പറഞ്ഞത് എന്നറിയണമല്ലോ. ആ വാക്കുകള് ഞാന് കേട്ടു. ചാക്കോച്ചന് സദുദ്ദേശത്തോടെ പറഞ്ഞ കാര്യം ഇങ്ങിനെയാണ് റിപ്പോര്ട്ട് ചെയ്യപ്പെട്ടത് എന്നാണ് മനസ്സിലാക്കുന്നത്.
എന്തായാലും ഒരു സര്ക്കാര് സ്കൂളില് ഉച്ചഭക്ഷണ സമയത്ത് സന്ദര്ശനം നടത്താന് ചാക്കോച്ചനെ സ്നേഹപൂര്വ്വം ക്ഷണിക്കുന്നു. ഞാനും വരാം. കുട്ടികള്ക്കും സന്തോഷമാവും.
കുഞ്ഞുങ്ങള്ക്കൊപ്പം ഭക്ഷണവും കഴിക്കാം. സ്കൂള് ഉച്ചഭക്ഷണത്തിന്റെ മെനുവും രുചിയും അറിയുകയും ചെയ്യാം.
