![](https://newsthen.com/wp-content/uploads/2022/11/gold-smuggling-e1667799115340.jpg)
മംഗളൂരു: മലദ്വാരത്തില് ലക്ഷങ്ങളുടെ സ്വര്ണം ഒളിപ്പിച്ച് കടത്തിയ യുവാവിനെ കസ്റ്റംസ് പിടികൂടി. മംഗളൂരു അന്താരാഷ്ട്ര വിമാനത്താവളത്തിലാണ് 45.7 ലക്ഷം രൂപയുടെ സ്വര്ണം കഴിഞ്ഞദിവസം പിടികൂടിയത്.
എയര് ഇന്ത്യ എക്സ്പ്രസില് എത്തിയ ദക്ഷിണ കന്നഡ സ്വദേശിയായ യാത്രക്കാരനില് നിന്നാണ് സ്വര്ണം പിടികൂടിയത്. ഇയാളുടെ പേരുവിവരങ്ങള് വ്യക്തമല്ല. വിമാനത്താവളത്തില്നിന്ന് ഇറങ്ങിയ ശേഷമുള്ള ഇയാളുടെ നടത്തവും സംശയാസ്പദമായ പെരുമാറ്റവും ശ്രദ്ധയില്പ്പെട്ടതോടെയാണ് പരിശോധനയ്ക്ക് വിധേയനാക്കിയത്. തുടര്ന്നാണ് മലദ്വാരത്തില് ഒളിപ്പിച്ച നിലയില് സ്വര്ണം കണ്ടെത്തിയതെന്ന് കസ്റ്റംസ് അറിയിച്ചു.
![Signature-ad](https://newsthen.com/wp-content/uploads/2024/06/signature.jpg)
കഴിഞ്ഞദിവസം തിരുവനന്തപുരം, തിരുച്ചിറപ്പള്ളി എന്നിവിടങ്ങളിലും സ്വര്ണവേട്ട നടന്നിരുന്നു. തിരുവനന്തപുരം അന്താരാഷ്ട്ര വിമാനത്താവളത്തില് ഒരു കോടിയോളം വില വരുന്ന സ്വര്ണമാണ് പിടികൂടിയതെന്ന് കസ്റ്റംസ് പറഞ്ഞു. സംഭവത്തില് തിരുവനന്തപുരം സ്വദേശിയെയാണ് പിടികൂടിയത്. ഇയാള് അടിവസ്ത്രത്തില് ഒളിപ്പിച്ച് സ്വര്ണം കടത്താന് ശ്രമിക്കുന്നുവെന്ന രഹസ്യ വിവരത്തിന്റെ അടിസ്ഥാനത്തില് നടത്തിയ പരിശോധനയിലാണ് സ്വര്ണം പിടികൂടിയത്.
തിരുച്ചിറപ്പള്ളി വിമാനത്താവളത്തില് നടന്ന പരിശോധനയില് 70 ലക്ഷം രൂപയുടെ സ്വര്ണമാണ് പിടികൂടിയത്. ദുബായിയില് നിന്ന് എത്തിയ യാത്രക്കാരനില് നടത്തിയ പരിശോധനയില് 977 ഗ്രാമിന്റെ സ്വര്ണമാണ് കണ്ടെടുത്തത്. മലദ്വാരത്തില് ഒളിപ്പിച്ച് കടത്തുന്നതിനിടെയാണ് സ്വര്ണം പിടികൂടിയതെന്നും കസ്റ്റംസ് അറിയിച്ചു.
സ്വര്ണത്തിന് വില ഉയര്ന്നതോടെ കടത്ത് വ്യാപകമായിട്ടുണ്ട്. വന് സംഘമാണ് ഇതിന് പിന്നില്. പിടിയിലാകുന്നത് കൂലിക്ക് കടത്തുന്നവര് മാത്രമാണ്.