റിയാദ്: പലസ്തീന്‍ വിഷയം ചര്‍ച്ച ചെയ്യാന്‍ റിയാദില്‍ ശനി, ഞായര്‍ ദിവസങ്ങളില്‍ അടിയന്തര അറബ്, ഇസ്ലാമിക് ഉച്ചകോടികള്‍ ചേരുന്നു. അറബ് ഉച്ചകോടി ശനിയാഴ്ചയും ഒഐസി ഉച്ചകോടി ഞായറാഴ്ചയുമാണ് നടക്കുക. ശനിയാഴ്ച റിയാദില്‍ നടക്കേണ്ടിയിരുന്ന അറബ്, ആഫ്രിക്ക ഉച്ചകോടി അടിയന്തര ഉച്ചകോടികളുടെ പശ്ചാത്തലത്തില്‍ മാറ്റിവച്ചിട്ടുണ്ട്.
പലസ്തീന്‍ ആക്രമണം വിശകലനം ചെയ്യാനും നിലപാടുകളും സമ്മര്‍ദങ്ങളും ഏകോപ്പിക്കാനുമാണ് അസാധാരണ ഉച്ചകോടികള്‍ വിളിച്ചുചേര്‍ത്തത്. ഒഐസി ഉച്ചകോടിയില്‍ ഇറാന്‍ പ്രസിഡന്റ് ഇബ്രാഹിം റഈസിയും തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാനും പങ്കെടുക്കുന്നുണ്ട്.
ഉച്ചകോടികള്‍ തീരുമാനിച്ച സാഹചര്യത്തില്‍ റിയാദില്‍ മുഴുവന്‍ വിദ്യാലയങ്ങള്‍ക്കും ഇന്ന് അവധി നല്‍കി ക്ലാസുകള്‍ ഓണ്‍ലൈന്‍ വഴിയാക്കിയിട്ടുണ്ട്. ഇമാം മുഹമ്മദ് ബിന്‍ സൗദ് ഇസ്ലാമിക് യൂണിവേഴ്സിറ്റി, പ്രിന്‍സസ് നൂറ ബിന്‍ത് അബ്ദുര്‍റഹ്‌മാന്‍ യൂണിവേഴ്സിറ്റികള്‍ ഇന്നത്തെ പരീക്ഷകള്‍ മാറ്റിവച്ചു.
അറബ് ലീഗുമായും ആഫ്രിക്കന്‍ യൂനിയന്‍ കമ്മീഷനുമായും ആശയവിനിമയം നടത്തിയ ശേഷമാണ് അറബ്, ആഫ്രിക്ക ഉച്ചകോടി നീട്ടിവെച്ചതെന്ന് സൗദി വിദേശ മന്ത്രാലയം അറിയിച്ചു. മേഖലയില്‍ നടക്കുന്ന രാഷ്ട്രീയ സംഭവവികാസങ്ങള്‍ പ്രതികൂലമായി ബാധിക്കാതിരിക്കാന്‍ വേണ്ടിയാണ് വികസന, സാമ്പത്തിക വശങ്ങള്‍ക്ക് ഊന്നല്‍ നല്‍കുന്ന അറബ്, ആഫ്രിക്ക ഉച്ചകോടി മാറ്റിവച്ചതെന്നും പുതിയ തീയതി നിശ്ചയിച്ചിട്ടില്ലെന്നും സൗദി വിദേശ മന്ത്രാലയം വിശദീകരിച്ചു.
അതിനിടെ, ഗാസയില്‍ വെടിനിര്‍ത്തല്‍ പ്രഖ്യാപിക്കണമെന്നും അന്താരാഷ്ട്ര സമൂഹം ഇക്കാര്യത്തില്‍ ഇടപെടണമെന്നും സഊദി മന്ത്രിസഭ ആവശ്യപ്പെട്ടു. ഭരണാധികാരി സല്‍മാന്‍ രാജാവിന്റെ അധ്യക്ഷതയില്‍ ചേര്‍ന്ന മന്ത്രിസഭാ യോഗം ഫലസ്തീന്‍ ജനതയ്ക്കുള്ള പിന്തുണ സൗദി ആവര്‍ത്തിച്ചു. പലസ്തീനുമായി ചരിത്രപരമായ ബന്ധമാണുള്ളതെന്നും സ്വതന്ത്ര പലസ്തീന്‍ എന്ന നീതിയുക്തവും സമഗ്രവുമായ നിലപാടില്‍ സൗദി ഉറച്ചുനില്‍ക്കുന്നതായും മന്ത്രിസഭ വ്യക്തമാക്കി. ദുരിതമനുഭവിക്കുന്നവര്‍ക്ക് മാനുഷിക സഹായമെത്തിക്കാന്‍ അന്താരാഷ്ട്ര സമൂഹം രംഗത്തിറങ്ങണമെന്നും അഭ്യര്‍ത്ഥിച്ചു.
