കൂടെവിടെ എന്ന ചിത്രത്തിലൂടെ പത്മരാജന്‍ മലയാള സിനിമയ്ക്ക് സമ്മാനിച്ച നടനാണ് റഹ്‌മാന്‍. തുടക്കം മുതല്‍ത്തന്നെ മുന്‍നിര സംവിധായകര്‍ക്കൊപ്പം പ്രവര്‍ത്തിക്കാനുള്ള അവസരമായിരുന്നു അദ്ദേഹത്തിന് ലഭിച്ചത്. മകനെപ്പോലെയാണ് പത്മരാജന്‍ സാര്‍ എന്നെ കൊണ്ടുനടന്നത്. പോവുന്നിടത്തെല്ലാം എന്നെ കൊണ്ടുപോവും. എന്റെ കാര്യങ്ങളില്‍ വലിയ ശ്രദ്ധയായിരുന്നു അദ്ദേഹത്തിനെന്നും, ആ വിയോഗം വലിയൊരു നഷ്ടമാണെന്നും റഹ്‌മാന്‍ പറഞ്ഞിരുന്നു. കരിയറിലെയും ജീവിതത്തിലെയും കാര്യങ്ങളെക്കുറിച്ച് പറഞ്ഞുള്ള റഹ്‌മാന്റെ അഭിമുഖം വൈറലായിക്കൊണ്ടിരിക്കുകയാണ്.
മകളുടെ പേരിന് പിന്നിലെ രഹസ്യത്തെക്കുറിച്ചും അദ്ദേഹം അഭിമുഖത്തില്‍ വെളിപ്പെടുത്തിയിരുന്നു. ”ശ്രീലങ്കയിലെ ആരാധികയുടെ പേരാണ് റുഷ്ദ. മൂത്തമകള്‍ക്ക് ആ പേര് നല്‍കുകയായിരുന്നു. അവര്‍ ഇടയ്ക്ക് വിളിച്ച് സംസാരിക്കാറുണ്ട്. അവരുടെ മകന് റഹ്‌മാന്‍ എന്നാണ് പേരിട്ടതെന്നും എന്നോട് പറഞ്ഞിരുന്നു. എന്നോട് നന്നായി പെരുമാറുന്നവരോട് ഞാനും തിരിച്ച് അതേപോലെ പെരുമാറും. എന്റെ ക്യാരക്ടര്‍ അങ്ങനെയാണ്. അല്ലാതെ ഇതിന് പിന്നില്‍ വേറെ ലക്ഷ്യങ്ങളൊന്നുമില്ലെന്നും” -അദ്ദേഹം പറയുന്നു.
അടുത്തിടെയായിരുന്നു മകള്‍ക്ക് ആണ്‍കുഞ്ഞ് ജനിച്ചത്. അയാന്‍ എന്നാണ് കൊച്ചുമകന് പേരിട്ടത്. അവന്‍ എന്റെ സഹോദരിയുടെ മകനാണെന്ന് പറഞ്ഞാല്‍ ആളുകള്‍ വിശ്വസിക്കും. അതാണ് അവസ്ഥയെന്നും അദ്ദേഹം പറഞ്ഞിരുന്നു. എത്ര തിരക്കുകളുണ്ടെങ്കിലും കുടുംബത്തിനൊപ്പം ചെലവഴിക്കാനായി റഹ്‌മാന്‍ സമയം കണ്ടെത്താറുണ്ട്. ചെന്നൈയിലായിരിക്കുമ്പോള്‍ ഞങ്ങളൊന്നിച്ച് ഔട്ടിംഗിന് പോവാറുണ്ട്. കേരളത്തില്‍ വന്നാല്‍ ഡയറ്റൊക്കെ ചിലപ്പോള്‍ പൊളിയാറുണ്ട്. ഇവിടെ കിട്ടുന്ന സാധനങ്ങള്‍ മാക്സിമം കഴിച്ചാണ് പോവാറുള്ളത്. അവിടെയത്തിയാല്‍ വര്‍ക്കൗട്ടില്‍ ശ്രദ്ധിക്കാറുണ്ടെന്നും അദ്ദേഹം വ്യക്തമാക്കിയിരുന്നു. അടുത്തിടെ റിലീസ് ചെയ്ത സമാര മികച്ച പ്രതികരണവുമായി മുന്നേറുകയാണ്. തന്നെ സംബന്ധിച്ച് കരിയര്‍ ബ്രേക്കായി മാറിയേക്കാവുന്ന ക്യാരക്ടറാണ് ചിത്രത്തിലേതെന്ന് റഹ്‌മാന്‍ വ്യക്തമാക്കിയിരുന്നു.
