തിരുവനന്തപുരം: വയോധികയെ ആക്രമിച്ചു മാല കവരാന്‍ ശ്രമിച്ച കേസിലെ പ്രതിയെ അയിരൂര്‍ പോലീസ് പിടികൂടി. ചെമ്മരുതി സ്വദേശി ശരത്തിനെയാണ് പോലീസ് അറസ്റ്റ് ചെയ്തത്. ഇക്കഴിഞ്ഞ ഏപ്രില്‍ 16 ന് വൈകുന്നേരം 6.30 ഓടെ വര്‍ക്കല ശ്രീനിവാസപുരം കൃഷ്ണ നിവാസില്‍ തൊണ്ണൂറ്റിനാലുകാരിയായ ദേവകിയെയാണ് ആക്രമിച്ചു മാല കവരാന്‍ ശ്രമിച്ചത്.
വീടിന്റെ ഹാളില്‍ ടിവി കണ്ടിരുന്ന ദേവകിയുടെ കഴുത്തില്‍ പ്രതി ശക്തിയായി അമര്‍ത്തി പിടിക്കുകയും മാല പൊട്ടിക്കാന്‍ ശ്രമിക്കുകയുമായിരുന്നു. ദേവകി ബഹളം വച്ചതിനെ തുടര്‍ന്ന് മകനായ കൃഷ്ണന്‍ ഓടി എടുത്തുകയും തടയാന്‍ ശ്രമിച്ച കൃഷ്ണനെ തള്ളിമാറ്റി പ്രതി ഓടി രക്ഷപ്പെടുകയുമായിരുന്നു.
തുടര്‍ന്ന് നാട്ടുകാര്‍ ഓടി കൂടിയെങ്കിലും പ്രതിയെ പിടിക്കാനായിരുന്നില്ല. സമാനമായ രീതിയില്‍ ഏപ്രില്‍ 10 ന് കൃഷ്ണന്റെ ഭാര്യ രമണിയെയും മോഷ്ടാവ് ആക്രമിച്ചിരുന്നു. രാത്രിയില്‍ പുറത്തേയ്ക്ക് ഇറങ്ങിയ രമണിയുടെ മുഖത്ത് കൈ കൊണ്ട് ബലം പ്രയോഗിച്ച് തള്ളി ഇട്ടശേഷം പ്രതി കടന്ന് കളഞ്ഞിരുന്നു.
നിലത്തു വീണ രമണിയുടെ ഒരു പല്ല് നഷ്ടപ്പെടുകയും ചെയ്തുവെന്ന് കാണിച്ചു അയിരൂര്‍ പോലീസില്‍ പരാതി നല്‍കിയിരുന്നു. സംഭവത്തില്‍ അയിരൂര്‍ എസ് ഐ സജിത് സ്ഥലത്ത് എത്തി വിവരങ്ങള്‍ ശേഖരിച്ചിരുന്നു. സമീപ പ്രദേശത്തെ സിസി ടിവികള്‍ പരിശോധിച്ചാണ് പോലീസ് മോഷ്ടാവിലേക്ക് എത്തിയത്.
സ്ഥിരമായി ലഹരി ഉപയോഗിക്കുന്ന ശരത്ത് പകല്‍ സമയം അലഞ്ഞു തിരിഞ്ഞു നടക്കുകയും ആള്‍താമസം ഇല്ലാത്തതും വയോധികര്‍ തമാസിക്കുന്നതുമായ വീടുകള്‍ കണ്ടെത്തി വച്ച ശേഷം രാത്രിയില്‍ മോഷണം നടത്തുകയുമാണ് രീതി എന്ന് അയിരൂര്‍ പോലീസ് അറിയിച്ചു . അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
