മലപ്പുറം: വാഹനം തടഞ്ഞ് യുവാവിനെ കൊലപ്പെടുത്താന്‍ ശ്രമിച്ച കേസില്‍ സ്‌കൂള്‍ പ്രിന്‍സിപ്പല്‍ അറസ്റ്റില്‍. തവനൂര്‍ ഒന്നാംമൈല്‍ മനയില്‍ ഗഫൂറിനെയാണ് കൊണ്ടോട്ടി പോലീസ് അറസ്റ്റു ചെയ്തത്.
തൃശ്ശൂര്‍ പാവറട്ടിയിലെ സ്വകാര്യ ഇംഗ്ലീഷ് മീഡിയം സ്‌കൂളിലെ പ്രിന്‍സിപ്പലാണ് ഇയാള്‍. അക്രമത്തില്‍ ഗുരുതരമായി പരിക്കേറ്റ കിഴിശ്ശേരി തവനൂര്‍ ഒന്നാംമൈല്‍ പള്ളിയാളിയില്‍ മുഹമ്മദ് അഷ്റഫിന്റെ പരാതിയിലാണ് നടപടി.
ഫെബ്രുവരി അഞ്ചിന് രാത്രിയാണ് കേസിനാസ്പദമായ സംഭവം. കോഴിക്കോട് നടന്ന അഷ്റഫ് കൂട്ടായ്മയുടെ പരിപാടിയില്‍ പങ്കെടുത്ത് സുഹൃത്തുക്കളെ അവരുടെ വീടുകളില്‍ ഇറക്കിയതിനു ശേഷം തനിച്ച് വീട്ടിലേക്ക് മടങ്ങുന്നതിനിടെ ഗഫൂറിന്റെ നേതൃത്വത്തില്‍ ബൈക്കില്‍ പിന്തുടര്‍ന്നെത്തിയ അഞ്ചംഗസംഘം വീടിന്റെ 200 മീറ്റര്‍ അകലെ കാര്‍ തടഞ്ഞുവച്ച് മര്‍ദിക്കുകയായിരുന്നു.
ഇരുമ്പ് കമ്പി ഉപയോഗിച്ച് തലയ്ക്കടിയ്ക്കാനുള്ള ശ്രമം തടയുന്നതിനിടെ കൈക്കും മൂക്കിനും പരിക്കേറ്റു. പ്രദേശവാസികള്‍ ഓടിക്കൂടിയതോടെ അക്രമികള്‍ ഓടി രക്ഷപ്പെടുകയായിരുന്നു. കേസില്‍ അഞ്ച് പ്രതികളാണുള്ളത്. കോടതി മുന്‍കൂര്‍ജാമ്യം തള്ളിയതോടെ ഇവര്‍ ഒളിവിലായിരുന്നു. ഗഫൂറിനെ കോടതിയില്‍ ഹാജരാക്കി. മറ്റു നാലു പ്രതികള്‍ക്കായി അന്വേഷണം നടക്കുന്നതായി പോലീസ് പറഞ്ഞു.
