കൊച്ചി: എംഡിഎംഎയുമായി മോഡല്‍ പിടിയില്‍. ചേര്‍ത്തല അര്‍ത്തുങ്കല്‍ സ്വദേശിയും മോഡലുമായ റോസ് ഹെമ്മ(ഷെറിന്‍ ചാരു-29)യാണ് 1.90 ഗ്രാം എംഡിഎംഎയുമായി പിടിയിലായത്. രഹസ്യമായി നടത്തുന്ന റേവ് പാര്‍ട്ടികള്‍ക്കു ലഹരിമരുന്ന് എത്തിച്ചു നല്‍കുന്ന സംഘത്തിലെ അംഗമാണ് ഇവര്‍. എന്‍ഫോഴ്‌സ്‌മെന്റ് അസി. കമ്മിഷണര്‍ ബി.ടെനിമോന്റെ നേതൃത്വത്തിലുള്ള സ്‌പെഷല്‍ ആക്ഷന്‍ സംഘമാണ് ഇവരെ പിടികൂടിയത്.
‘സ്‌നോബോള്‍’ എന്ന പേരിലാണ് ഇവര്‍ ലഹരി കൈമാറിയിരുന്നത്. ഓണ്‍ലൈനായി പലരുടെയും പേരില്‍ മുറി ബുക്ക് ചെയ്ത് ഏതാനും ദിവസം താമസിച്ച ശേഷം അടുത്ത സ്ഥലത്തേക്കു മാറും. ഇവരുടെ പ്രധാന ഇടനിലക്കാരനായ യുവാവ് സ്‌പെഷല്‍ ആക്ഷന്‍ സംഘത്തിന്റെ പിടിയിലായതോടെയാണ് കൂടുതല്‍ വിവരങ്ങള്‍ എക്‌സൈസിനു ലഭിച്ചത്.
വൈറ്റില- ഇടപ്പള്ളി ദേശീയപാതയ്ക്കു സമീപം പാടിവട്ടത്ത് ഇടനിലക്കാരനെ കാത്തുനില്‍ക്കുന്നു എന്ന വിവരത്തിന്റെ അടിസ്ഥാനത്തില്‍ നടത്തിയ തിരച്ചിലിലാണ് കഴിഞ്ഞ ദിവസം അര്‍ധരാത്രിയോടെ ഇവരെ കണ്ടെത്തിയത്.
