എംപുരാനും ജാനകിക്കും ശേഷം വീണ്ടും മലയാളസിനിമയ്ക്കിട്ട് സെന്സര്ബോര്ഡിന്റെ ‘കത്രികക്കുത്ത്’ ; ഷൈന് നിഗത്തിന്റെ ‘ഹാല്’ സിനിമയിലെ ബീഫ്ബിരിയാണിരംഗം നീക്കണമെന്ന് ആവശ്യം
എംപുരാനും ജാനകീ വേഴ്സസ് സ്റ്റേറ്റ് ഓഫ് കേരളയ്ക്കും പിന്നാലെ മറ്റൊരു സിനിമയ്ക്ക് കൂടി കേന്ദ്ര സെന്സര്ബോര്ഡിന്റെ കത്രികപ്പൂട്ട്. ഷൈന് നിഗം നായകനായ ‘ഹാലി’നിട്ടാണ് ഇത്തവണത്തെ പണി. സിനിമയില് നിന്നും ബീഫ്ബിരിയാണി രംഗം എടുത്തുമാറ്റാനാണ് ആവശ്യം. ഇതിനെ തുടര്ന്ന് സിനിമയുടെ നിര്മ്മാതാക്കള് കേരളാഹൈക്കോടതിയെ സമീപിച്ചു.
മതപരമായ കാര്യങ്ങള് ചൂണ്ടിക്കാട്ടിയാണ് സെന്സര് ബോര്ഡിന്റെ ഉത്തരവ്. ചില രംഗങ്ങളും സംഭാഷണങ്ങളും നീക്കം ചെയ്യാന് സെന്ട്രല് ബോര്ഡ് ഓഫ് ഫിലിം സര്ട്ടിഫിക്കേഷന് നിര്മ്മാതാക്കളോട് ആവശ്യപ്പെട്ടു. റിവൈസിംഗ് കമ്മിറ്റി ചിത്രത്തിന് ‘എ’ സര്ട്ടിഫിക്കറ്റ് നല്കുമ്പോള്, മതം, സംസ്കാരം എന്നിവയുമായി ബന്ധപ്പെട്ട ഭാഗങ്ങള് നീക്കം ചെയ്യാന് ആവശ്യപ്പെട്ടു.
ഇത് നിയന്ത്രണമില്ലാത്ത പൊതു പ്രദര്ശനത്തിന് അനുയോജ്യമല്ലെന്ന് കമ്മിറ്റി അറിയിച്ചു. ബോര്ഡിന്റെ നിര്ദ്ദേശത്തെ ചോദ്യം ചെയ്തുകൊണ്ട് ചലച്ചിത്ര പ്രവര്ത്തകര് തുടര്ന്ന് കേരള ഹൈക്കോടതിയെ സമീപിച്ചിരിക്കുകയാണ്. പിടിഐ റിപ്പോര്ട്ട് അനുസരിച്ച്, ബീഫ് ബിരിയാണി കഴിക്കുന്ന രംഗങ്ങളും ‘ധ്വജ് പ്രണാമം’ എന്ന് പരാമര്ശിക്കുന്ന സംഭാഷണങ്ങളും നീക്കം ചെയ്യാനും നിര്ദ്ദേശിച്ചു.
ഇത് മതവികാരം വ്രണപ്പെടുത്തുമെന്നാണ് ബോര്ഡിന്റെ വാദം. സിനിമ റിലീസ് ചെയ്യുന്നതിന് ഈ മാറ്റങ്ങള് നിര്ബന്ധമാണെന്ന് ബോര്ഡ് പ്രസ്താവിച്ചപ്പോള്, ഇത് ‘അന്യായവും അമിതവുമാണ്’ എന്ന് ചലച്ചിത്ര പ്രവര്ത്തകര് അഭിപ്രായപ്പെട്ടു.
സംവിധായകന് പ്രശാന്ത് വിജയകുമാര് ഈ തീരുമാനത്തില് നിരാശ പ്രകടിപ്പിച്ചു. ”ഞങ്ങളുടെ സിനിമയില് അക്രമങ്ങളില്ല, ഇതൊരു കുടുംബ ചിത്രമാണ്. ഉള്ളടക്കം കോടതി പരിശോധിക്കട്ടെ, തീരുമാനിക്കട്ടെ. ചിത്രം ഒരു മതത്തെയോ വിശ്വാസത്തെയോ അപമാനിക്കുന്നില്ല. സിബിഎഫ്സി യുടെ ആവശ്യങ്ങള് വളരെ വിചിത്രമാണെന്ന് സംവിധായകന് പറഞ്ഞു.
നിര്ദ്ദേശിച്ച മാറ്റങ്ങള് വരുത്തിയാലും ‘ഹാളിന്’ മുതിര്ന്നവര്ക്കുള്ള സര്ട്ടിഫിക്കറ്റ് മാത്രമേ ലഭിക്കൂ എന്ന് കൂട്ടിച്ചേര്ത്ത സംവിധായകന് ബോര്ഡിന്റെ യുക്തിയെ ചോദ്യം ചെയ്തു. നവാഗതനായ വീര സംവിധാനം ചെയ്യുന്ന ‘ഹാള്’, ‘ലിറ്റില് ഹാര്ട്ട്സിന്’ ശേഷം ഷെയ്ന് നിഗം ഒരു റൊമാന്റിക് നായകനായി തിരിച്ചെത്തുന്ന അദ്ദേഹത്തിന്റെ കരിയറിലെ ഏറ്റവും വലിയ പ്രോജക്റ്റുകളില് ഒന്നാണ്. ചിത്രത്തില് സാക്ഷി വൈദ്യയാണ് നായിക. ജോണി ആന്റണി, നിഷാന്ത് സാഗര്, മധുപാല്, ജോയ് മാത്യു എന്നിവരും എത്തുന്നു.
‘ഹാളി’ന് ഒരു പ്രത്യേകത കൂടിയുണ്ട്: ഗായകന് ആതിഫ് അസ്ലം ഒരു മലയാള സിനിമയ്ക്ക് വേണ്ടി ആദ്യമായി ശബ്ദം നല്കുന്നു. ഈ ബഹുഭാഷാ ചിത്രം മലയാളം, ഹിന്ദി, തെലുങ്ക്, തമിഴ്, കന്നഡ ഭാഷകളില് ഒരേ സമയം തിയേറ്ററുകളില് എത്താന് ഒരുങ്ങുകയാണ്.
