ബെംഗളുരു: ലൈംഗികാതിക്രമം നടത്തിയെന്ന ഒമ്പതാം ക്ലാസുകാരിയുടെ പരാതിയില്‍ അമ്മയുടെപേരില്‍ പോക്സോ കേസെടുത്ത് ബെംഗളൂരു പോലീസ്. വിവാഹത്തിനുശേഷം ഭര്‍ത്താവിനോട് പെരുമാറുന്നതിനെപ്പറ്റി പറഞ്ഞു കൊടുക്കുന്നതിനിടെ ലൈംഗികാതിക്രമം നടത്തിയെന്ന പെണ്‍കുട്ടിയുടെ മൊഴിയിലാണ് 45-കാരിയുടെ പേരില്‍ ആര്‍ടി നഗര്‍ പോലീസ് കേസെടുത്തത്.
സ്‌കൂളിലെ കൗണ്‍സിലറോടാണ് പെണ്‍കുട്ടി വിവരം വെളിപ്പെടുത്തിയത്. കൗണ്‍സിലര്‍ പോലീസിനെ വിവരമറിയിക്കുകയായിരുന്നു. തുടര്‍ന്ന് അമ്മയെ പോലീസ് ചോദ്യംചെയ്തു. മകളുടെ ആരോപണം അമ്മ നിഷേധിച്ചു. മകളെ വഴക്കുപറയുകയും തല്ലുകയും ചെയ്തിട്ടുണ്ടെങ്കിലും ലൈംഗികാതിക്രമത്തിന് വിധേയമാക്കിയിട്ടില്ലെന്ന് പറഞ്ഞു.
പരാതിക്കാരിയായ പെണ്‍കുട്ടിയുടെ മൂത്ത സഹോദരിയെ പോലീസ് ചോദ്യം ചെയ്തെങ്കിലും വ്യക്തമായ ഉത്തരങ്ങള്‍ നല്‍കിയില്ല. രണ്ടു പെണ്‍കുട്ടികള്‍ക്കുമൊപ്പം കഴിയുന്ന സ്ത്രീയുടെ ഭര്‍ത്താവ് വേറെയാണ് താമസം.
