പത്തനംതിട്ട: യുവാവിന്റെ ജനനേന്ദ്രിയം കടിച്ചുമുറിച്ച കേസില്‍ കസ്റ്റഡിയിലിരിക്കെ ചാടിപ്പോയ പ്രതിക്കായി പോലീസ് അന്വേഷണം ഊര്‍ജിതമാക്കി. കുറ്റപ്പുഴ പാപ്പിനിവേലില്‍ സുബിന്‍ അലക്സാണ്ടര്‍ (28) ആണ് ചാടിപ്പോയത്. ഒട്ടേറെ ക്രിമിനല്‍ കേസുകളില്‍ മുമ്പ് സുബിന്‍ ഉള്‍പ്പെട്ടിട്ടുണ്ട്.
ഈ കേസുകളില്‍ സുബിന്റെ കൂട്ടുപ്രതികളായിട്ടുള്ളവരുടെ സഹായത്താലാണോ ഇയാള്‍ ഒളിവില്‍ കഴിയുന്നതെന്ന് പോലീസ് പരിശോധിച്ചുവരികയാണ്. ചൊവ്വാഴ്ച രാത്രി ബാര്‍ പരിസരത്ത് നടന്ന അടിപിടിക്കിടെ അയല്‍വാസിയായ യുവാവിന്റെ ജനനേന്ദ്രിയമാണ് സുബിന്‍ കടിച്ചുമുറിച്ചത്.
അടിപിടിയില്‍ സുബിനും പരിക്കേറ്റു. അടിപിടിയറിഞ്ഞ് പോലീസ് സുബിനെ ഉടന്‍ കസ്റ്റഡിയില്‍ എടുത്തിരുന്നു. എന്നാല്‍, രാത്രിയില്‍ സ്റ്റേഷനില്‍നിന്നും ഇയാള്‍ കടന്നു. സുബിന്‍ രക്ഷപ്പെട്ടശേഷമാണ് കേസ് രജിസ്റ്റര്‍ ചെയ്തത്. പാറാവ് ജോലിയില്‍ ഉണ്ടായിരുന്നയാള്‍ക്കടക്കം വീഴ്ചയുണ്ടായിട്ടുണ്ടോയെന്ന് പരിശോധിച്ചശേഷം അച്ചടക്കനടപടി ഉണ്ടാകും.
