രാജ്യത്തെ ഏറ്റവും ജനപ്രിയമായ സമ്ബാദ്യ പദ്ധതികളില്‍ ഒന്നാണ് ഇന്ത്യാ പോസ്റ്റ് ലഭ്യമാക്കുന്ന പ്രതിമാസ വരുമാന പദ്ധതി. വിരമിക്കലിന് ശേഷമോ അതിനുമുമ്ബോ പ്രതിമാസ വരുമാനം ക്രമീകരിക്കണമെങ്കില്‍, പോസ്റ്റ് ഓഫീസിന്റെ ഈ പദ്ധതിയില്‍ നിങ്ങള്‍ക്ക് നിക്ഷേപം ആരംഭിക്കാം.5 വര്‍ഷത്തേക്ക് ഒറ്റത്തവണ നിക്ഷേപിക്കുകയും പലിശ വരുമാനം പ്രതിമാസത്തില്‍ ലഭിക്കുകയും ചെയ്യുന്ന പദ്ധതിയാണിത്.
പ്രായപൂര്‍ത്തിയായ ഏതൊരു വ്യക്തിക്കും ആവശ്യമായ രേഖകള്‍ സഹിതം അടുത്തുള്ള പോസ്റ്റ് ഓഫീസിലെത്തി അക്കൗണ്ട് തുറക്കാം.വ്യക്തിഗത അക്കൗണ്ടില്‍ പരമാവധി 9 ലക്ഷം രൂപയും ജോയിന്റ് അക്കൗണ്ടിൽ 15 ലക്ഷം രൂപയും നിക്ഷേപിക്കാം. നേരത്തെ നിക്ഷേപ പരിധി 4.50 ലക്ഷം, 9 ലക്ഷം എന്നിങ്ങനെയായിരുന്നു. ഏറ്റവും കുറഞ്ഞ നിക്ഷേപം 1000 രൂപയാണ്.പോസ്റ്റ് ഓഫീസ് മന്ത്ലി ഇങ്കം സ്കീമിന് 7.4 ശതമാനം വാര്‍ഷിക പലിശ നിരക്കാണ് നിലവില്‍ പോസ്റ്റ് ഓഫീസ് വാഗ്ദാനം ചെയ്യുന്നത്.
വരുമാനം എത്ര നേടാം
പോസ്റ്റ് ഓഫീസ് എംഐഎസില്‍ 5 ലക്ഷം രൂപ നിക്ഷേപിച്ചാല്‍, 7.4 ശതമാനം പലിശ നിരക്കില്‍ എല്ലാ മാസവും 3,083 രൂപ ലഭിക്കും.
അതേസമയം, പരമാവധി 9 ലക്ഷം രൂപ നിക്ഷേപിച്ചാല്‍, നിങ്ങള്‍ക്ക് പ്രതിമാസം 5,550 രൂപ നേടാം.
ഒരു ജോയിന്റ് അക്കൗണ്ടില്‍ 15 ലക്ഷം രൂപ നിക്ഷേപിച്ചാല്‍, ഈ സ്കീമിലൂടെ എല്ലാ മാസവും 9,250 രൂപ നേടാം.
ഇനി അഞ്ചുവര്‍ഷത്തിനുശേഷം നിക്ഷേപം പിൻവലിക്കുകയാണെങ്കിൽ മുഴുവൻ തുകയും നിങ്ങൾക്ക് ഒറ്റയടിക്ക് ലഭിക്കും.
