പാലക്കാടൻ കാഴ്ചകളില്‍ ഒരിക്കലും വിട്ടുപോകരുതാത്ത കുറച്ചിടങ്ങൾ പരിചയപ്പെടാം….
പാലക്കാടിനെ കാണാനുള്ള യാത്രയിൽ ആദ്യത്തെ സ്റ്റോപ്പ് പാലക്കാട് കോട്ട തന്നെയാണ്. നഗരത്തിനു ഒത്ത നടുവിൽ സ്ഥിതി ചെയ്യുന്ന ഈ കോട്ട ഹൈദരലിയാണ് നിർമ്മിച്ചതെങ്കിലും അറിയപ്പെടുന്നത് ടിപ്പു സുൽത്താന്‍റെ പേരിലാണ്. വീരകഥകളുടെ പേരിൽ പ്രശസ്തമായ ഈ കോട്ട ഇന്ന് ആർക്കിയോളജിക്കൽ സർവ്വേ ഓഫ് ഇന്ത്യയുടെ കീഴിലാണ്.
പറമ്പിക്കുളം അണക്കെട്ടിനു ചുറ്റുമായി സ്ഥിതി ചെയ്യുന്ന പറമ്പിക്കുളം വന്യജീവി സങ്കേതമാണ് ഇവിടുത്തെ അടുത്ത പ്രധാനപ്പെട്ട സ്ഥലം. പക്ഷേ, പാലക്കാട് നിന്നും 90 കിലോമീറ്റർ അകലെയാണ് എന്നതാണ് ഈ സ്ഥലത്തിന്റെ പ്രധാന പോരായ്മ. കൃത്യമായ തയ്യാറെടുപ്പുകളോടെയും പ്ലാനിങ്ങോടെയും വരുന്നവർക്ക് മാത്രമേ ഇവിടം സന്ദർശിക്കാനാവൂ. കേരളത്തിലെ രണ്ടാമത്തെ കടുവാ സംരക്ഷണ കേന്ദ്രം ഇവിടെയാണ് സ്ഥിതി ചെയ്യുന്നത്.
ഒരു കാലത്ത് മലയാളികളുടെ പ്രിയപ്പെട്ട ഇടങ്ങളിലൊന്നായിരുന്നു മലമ്പുഴ ഡാമും പരിസരവും. സ്കൂൾ കോളേജ് വിനോദയാത്രകളുടെ പ്രധാന ഇടങ്ങളിലൊന്നായി്രുന്ന മലമ്പുഴയ്ക്ക് ഇടക്കാലത്തു വെച്ച് പഴയ പ്രതാപമെല്ലാം നഷ്ടപ്പെട്ടിരുന്നു. ഇപ്പോൾ വീണ്ടും മടങ്ങിവരവിന്റെ പാതയിലാണ് ഇവിടം.
മലന്പുഴ ഡാം, പാർക്ക്, ഉദ്യാനം, ഫാന്റസി പാർക്ക്, സൈക്ലിങ് തുടങ്ങിയവയാണ് ഇവിടുത്തെ ആകർഷണങ്ങൾ.
പാലക്കാടിന്റെ അധികമാരും അറിയാത്ത ഇടങ്ങളിലൊന്നാണ് കവ. മഴയുടെ സൗന്ദര്യം ഏറ്റവും അധികം ആസ്വദിക്കുവാൻ പറ്റിയ ഒരിടമായ കവ മലമ്പുഴയ്ക്ക് സമീപമാണ് സ്ഥിതി ചെയ്യുന്നത്. റിസർവ്വ് ഫോറസ്റ്റിലൂടെയുള്ള യാത്രയും കോടമഞ്ഞ് ഇറങ്ങി വരുന്ന മലകളും വലിയ കല്ലിൻകൂട്ടങ്ങളും ഒക്കെയായുള്ള ഇവിടം മണിക്കൂറുകൾ കൊണ്ട് കറങ്ങിത്തീർക്കുവാൻ പറ്റും. പശ്ചിമഘട്ടത്തോട് ചേർന്നു സ്ഥിതി ചെയ്യുന്ന ഇവിടുത്തെ കാഴ്ചകൾ കാണാൻ കവ വ്യൂ പോയിൻറിൽ പോകാം.
പാവപ്പെട്ടവരുടെ ഊട്ടി എന്നറിയപ്പെടുന്ന സ്ഥലമാണ് നെല്ലിയാമ്പതി. പാലക്കാട് ടൗണിൽ നിന്നും 60 കിലോമീറ്റർ അകലെ സ്ഥിതി ചെയ്യുന്ന ഇവിടം പാലക്കാടിൻരെ മൂന്നാറാണ്. തേയിലയും കാപ്പിയും ഒക്കെ കൃഷി ചെയ്യുന്ന ഇവിടം നിത്യഹരിത വനമേഖലയാണ്.
പാലക്കാടൻ കാഴ്ചകളിൽ പ്രധാനപ്പെട്ട ഒരിടമാണ് പോത്തുണ്ടി ഡാമും പരിസരവും. നെല്ലിയാമ്പതിയോട് കുറച്ച് അടുത്തു സ്ഥിതി ചെയ്യുന്ന ഇവിടം പാലക്കാട് നിന്നും 42 കിലോമീറ്റർ അകലെയാണ്. ഇന്ത്യിലെ മണ്ണുകൊണ്ടുണ്ടാക്കിയ അണക്കെട്ടുകളിൽ ഏറ്റവും വലിയ അണക്കെട്ടുകൂടിയാണ് പോത്തുണ്ടി അണക്കെട്ട്.
നെല്ലിയാമ്പതിയുടെ കവാടം എന്നറിയപ്പെടുന്ന നെന്മാറ ചിറ്റൂർ താലൂക്കിലാണ് സ്ഥിതി ചെയ്യുന്നത്. പോത്തുണ്ടിയിൽ നിന്നും ഒൻപത് കിലോമീറ്റർ അകലെ സ്ഥിതി ചെയ്യുനന് ഇവിടം നെന്മാറ വേലകളിക്ക് പേരുകേട്ടതാണ്.
കൊല്ലങ്കോട്
നെൽവയലുകളുടെ പച്ചപ്പരപ്പ്, പാടവരമ്പുകളിൽ പീലി വിരിച്ചതുപോലെ തെങ്ങുകളും കരിമ്പനകളും, ഓല മേഞ്ഞ പുരകൾ, ഇല്ലിയും പൂച്ചെടികളും കൊണ്ട് തീർത്ത വേലിക്കെട്ട്… സഞ്ചരിക്കുന്ന വാഹനം ടൈം മെഷീൻ ആണോ എന്നു സഞ്ചാരികൾക്കു തോന്നിപ്പിക്കുന്ന പാലക്കാടൻ ഗ്രാമക്കാഴ്ചകൾ. ഇന്നലെകളിലെ കേരളത്തിന്റെ ഗ്രാമത്തനിമ ഇന്നും നിലനിർത്തുന്ന കൊല്ലങ്കോട് ഇന്ത്യയിലെ ഏറ്റവും സുന്ദരമായ പത്തു ഗ്രാമങ്ങളിൽ ഒന്നായി തിരഞ്ഞെടുക്കപ്പെട്ടത് ഈ അടുത്ത കാലത്താണ്.
മുതലമട
കേരളത്തിന്റെ മാംഗോ സിറ്റിയാണ് മുതലമട. സംസ്ഥാനത്തെ ഏറ്റവും വലിയ പഞ്ചായത്തുകളിലൊന്നും ഇത് തന്നെ. ജലസേചനത്തിനായി ഉപയോഗിക്കുന്ന അഞ്ച് ഡാമുകളുണ്ട്. ഒരു യാത്രാമൊഴി, വെട്ടം, മേഘം തുടങ്ങി ധാരാളം സിനിമകളുടെ ചിത്രീകരണം നടന്ന ഒരു റെയിൽവേ സ്റ്റേഷനും മുതലമടയിലുണ്ട്.
പാലക്കാടിന്റെ പാരമ്പര്യങ്ങളിലൂടെ ഒരു യാത്ര ആഗ്രഹിക്കുന്നവർക്ക് പറ്റിയ ഇടമാണ് കൽപ്പാത്തിയിലെ ക്ഷേത്രങ്ങളും അഗ്രഹാരവും ഒക്കെ. തെക്കൻ കാശി എന്നറിയപ്പെടുന്ന കൽപ്പാത്തി കേരളത്തിലെ ആദ്യകാല ബ്രാഹ്മണ കുടിയേറ്റം നടന്ന സ്ഥലങ്ങളിലൊന്നു കൂടിയാണ്. തമിഴ്ബ്രാഹ്മണർ കൂടുതലായി താമസിക്കുന്ന ഇവിടം പാലക്കാട്
നിന്നും മൂന്നു കിലോമീറ്റർ മാത്രം അകലെയുള്ള ഇടമാണ്.
കല്‍പ്പാത്തിയിലെ ശ്രീ വിശാലാക്ഷി സമേത ശ്രീ വിശ്വനാഥസ്വാമി ക്ഷേത്രത്തിലാണ് ലോകപ്രശസ്തമായ കല്‍പ്പാത്തി രഥോത്സവം നടക്കുന്നത്. 700 വര്‍ഷം പഴക്കമുണ്ട് ഈ ക്ഷേത്രം കേരളത്തിലെ പഴക്കം ചെന്ന ശിവക്ഷേത്രങ്ങളിലൊന്നാണ്. ശിവനെയും പത്‌നി പാര്‍വ്വതിയെയുമാണ് വിശ്വനാഥനും വിശാലാക്ഷിയുമായി ഇവിടെ പ്രതിഷ്ഠിച്ചിരിക്കുന്നത്.
