KeralaNEWS

ഇന്ന് പിതൃക്കളുടെ ദിനം; മോക്ഷത്തിനായി ബലിയിടാം

ർക്കടക മാസത്തിലെ അമാവാസി. പിതൃക്കളുടെ ദിനം. അന്നു ബലിയിട്ടാല്‍ പിതൃക്കള്‍ക്കു മോക്ഷം കിട്ടുമെന്നു വിശ്വാസം.

കര്‍ക്കടക മാസം കറുത്തവാവിന് പിതൃക്കള്‍ക്ക് ബലി ഇടുന്നത് വിശേഷമാണ്. എല്ലാ മാസവും വാവിന് ബലി ഇടാന്‍ സാധിച്ചില്ലെങ്കിലും പിതൃക്കളുടെ മാസമായ കര്‍ക്കടകത്തിലെ വാവിന് ബലി നിര്‍ബന്ധമായും ഇടണമെന്ന് പഴമക്കാര്‍ പറയുന്നു. ക്ഷേത്രത്തിലോ തീര്‍ത്ഥ സ്ഥലങ്ങളിലോ വീട്ടില്‍ വച്ചോ ഇത് ചെയ്യാം. വാവിന്റെ തലേന്ന് ഒരിക്കല്‍ എടുക്കണം.

പിതൃക്കളുടെ ആത്മശാന്തിക്കായി പുണ്യതീര്‍ത്ഥങ്ങളില്‍ ബലിയര്‍പ്പിക്കുന്ന ദിവസമാണ് കര്‍ക്കടക വാവ്. കാക്കകള്‍ ചോറ് എടുക്കുന്നതിലൂടെ പിതൃക്കള്‍ അത് സ്വീകരിച്ചതായി കണക്കാക്കുന്നു. കാക്ക എടുത്തില്ലെങ്കില്‍ നദിയിലോ കുളത്തിലോ കടലിലോ സമര്‍പ്പിക്കാം.

മക്കള്‍ ജീവിച്ചിരിക്കുന്ന കാലം മുഴുവനും ഇത് ചെയ്യണം. മക്കളല്ലെങ്കിലും മരിച്ചവരുടെ സ്വത്ത് കിട്ടിയിട്ടുണ്ടെങ്കില്‍ അവരും ബലി ഇടണമെന്ന് ആചാര്യമതം.

ഗരുഡ പുരാണത്തില്‍ മഹാവിഷ്ണുവിനോട് ഇതേ കുറിച്ച് ഗരുഡന്‍ ചോദിക്കുന്ന സംശയങ്ങള്‍ക്ക്  മറുപടിയായി സാക്ഷാല്‍ മഹാവിഷ്ണു തന്നെ ബലി ഇടേണ്ടതിന്റെ ആവശ്യകത വ്യക്തമാക്കുന്നുണ്ട്. ഒരുകാരണവശാലും ബലി ഇടാതിരിക്കാന്‍ സാധിക്കില്ലെന്നും അസന്നിഗ്ധമായി ഇതില്‍ പ്രതിപാദിക്കുന്നുണ്ട്.

തലേദിവസം വ്രതമെടുത്ത് അമാവാസി ദിവസം കുളിച്ചു ഈറനണിഞ്ഞു മരിച്ച് മണ്മറഞ്ഞുപോയ പിതൃക്കളെ മനസ്സില്‍ സങ്കല്‍പ്പിച്ചു ഭക്തിപുരസരം വേണം ബലിയിടേണ്ടത്. എള്ളും, പൂവും, ഉണക്കലരിയും ഉള്‍പ്പെടെയുള്ള പൂജാദ്രവ്യങ്ങള്‍കൊണ്ടാണ് ബലിതര്‍പ്പണം നടത്തുക. പിതൃക്കള്‍ക്ക് ബലിയിടുന്നവരാണ് വ്രതം എടുക്കേണ്ടത്. ഇവര്‍ വ്രതം തെറ്റിച്ചാല്‍ പിതൃക്കള്‍ ബലി എടുക്കില്ലയെന്നും അവരുടെ ആത്മാവിന് ശാന്തി കിട്ടില്ലെന്നും പ്രായമായവര്‍ പറയാറുണ്ട്.

 

ബലിതര്‍പ്പണം കഴിഞ്ഞാല്‍ പിതൃക്കള്‍ക്ക് ഇഷ്ടമുള്ള ഭക്ഷണം തയ്യാറാക്കി വിളമ്പുകയാണ് അടുത്ത ചടങ്ങ്. വിളക്ക് കത്തിച്ച് വെച്ച് ഉണ്ടാക്കിയ സദ്യ ഇലയിട്ട് ആദ്യം പിതൃക്കള്‍ക്ക് നല്‍കും. അതിനുശേഷമേ വീട്ടുകാര്‍ കഴിക്കുകയുള്ളൂ.

Back to top button
error: