ചങ്ങനാശ്ശേരി താലൂക്കിൽ മാമ്മൂട് ശാന്തിപുരത്തിന് സമീപം കോട്ടയം, പത്തനംതിട്ട ജില്ലകളുടെ അതിർത്തി പ്രദേശത്തായി സ്ഥിതിചെയ്യുന്ന ഒരു ക്ഷേത്രമാണ് പരപ്പുകാട് മഹാദേവീക്ഷേത്രം.കറു
തഞ്ചാവൂർ ശില്പചാരുതയോടെ തല ഉയർത്തി നിൽക്കുന്ന ഈ ക്ഷേത്രം ശാന്തിപുരം മാമുണ്ട പരപ്പുകാട് മഹാദേവീക്ഷേത്രമെന്നാണ് അറിയപ്പെടുന്നത്.സത്യത്തിൽ ഇതൊരു കുടുംബക്ഷേത്രമാണ്. തഞ്ചാവൂർ ശൈലിയിൽ നിർമ്മിച്ച 83 അടിയുള്ള കൂറ്റൻ ഗോപുരങ്ങളോടുകൂടിയതാണ് ഈ ക്ഷേത്രം.
മാമൂടിനും കറുകച്ചാലിനും മല്ലപ്പള്ളിക്കും സമീപം ശാന്തിപുരം ഗ്രാമത്തിന്റെ ഉൾപ്രദേശത്താണ് ഈ ക്ഷേത്രം ഉള്ളളത്.ശിവനും പാർവതിയും ദുർഗയും ഒരേ ശ്രീകോവിലിൽ നിലകൊള്ളുന്നു എന്ന സവിശേഷതയും ഈ ക്ഷേത്രത്തിനുണ്ട്. മധുരമീനാക്ഷി, പഴനി ക്ഷേത്രങ്ങളോടുള്ള സാമ്യവും കൂറ്റൻ തൂണുകളും ശില്പങ്ങളും നിറഞ്ഞ ക്ഷേത്രം രണ്ടര ഏക്കറോളം സ്ഥലത്താണ് നിലകൊള്ളുന്നത്.
തഞ്ചാവൂരിൽനിന്നുള്ള ശില്പികളാണ് ക്ഷേത്രം നിർമിച്ചത്. 1998-ൽ നിർമാണം ആരംഭിച്ച ക്ഷേത്രം 2013-ലാണ് പുർത്തിയായത്. 15 വർഷംകൊണ്ട് നൂറുകണക്കിന് പേർ ചേർന്നാണ് ക്ഷേത്രം നിർമിച്ചത്. പന്ത്രണ്ടേമുക്കാൽ അടി ഉയരമുള്ള ശ്രീരാമന്റെയും പത്തടിയോളമുള്ള ഹനുമാൻസ്വാമിയുടെയും കൃഷ്ണശിലയിൽ തീർത്ത കൂറ്റൻ വിഗ്രഹങ്ങൾ ക്ഷേത്രത്തിന്റെ മാറ്റ് കൂട്ടുന്നു.പ്രധാന ശ്രീകോവിലിന് പുറമേ ഒൻപത് ശ്രീകോവിലുകൾ കൂടിയുണ്ട് ഇവിടെ. ഭദ്രകാളി, ഗണപതി, ശ്രീരാമൻ, ഹനുമാൻ, ശാസ്താവ്, സുബ്രഹ്മണ്യസ്വാമി, ധന്വന്തരിമൂർത്തി, മൃത്യുഞ്ജയമൂർത്തി, സരസ്വതീദേവി എന്നിവർക്കും പ്രത്യേകം ശ്രീകോവിലുകളുണ്ട്.
പരപ്പുകാട് കുടുംബം വക േക്ഷത്രമാണിത്. പതിറ്റാണ്ടുകൾക്ക് മുൻപ് ക്ഷേത്രം നിലകൊള്ളുന്ന സ്ഥലത്ത് ഒരു മരച്ചുവട്ടിൽ പാർവതിദേവിയെ ആരാധിച്ചിരുന്നതായാണ് പഴമക്കാർ പറയുന്നത്. പിന്നീട് ഇത് നിലച്ചു. മരച്ചില്ല വീണ് ദേവീവിഗ്രത്തിന്റെ കൈ ഒടിഞ്ഞതോടെ വിഗ്രഹം പുഴയിൽ ഒഴുക്കുകയായിരുന്നു. ഈ കുടുംബത്തിലെ മുതിർന്ന അംഗമായിരുന്ന അമ്മുക്കുട്ടിയമ്മയുടെ ആഗ്രഹപ്രകാരമാണ് പുതിയ ക്ഷേത്രം നിർമിക്കാൻ തീരുമാനിച്ചത്.അമ്മുക്കുട്ടിയമ്മയുടെ മകൻ കെ.വി.പ്രഭാകരൻ നായർ, ഭാര്യ രാധാ പി.നായർ എന്നിവർ ചേർന്നാണ് ക്ഷേത്രം നിർമിച്ചത്.
മകരമാസത്തിലാണ് ഇവിടത്തെ പൊങ്കാല ഉത്സവം.പതിനഞ്ചു കോടിയായിരുന്നു നിർമ്മാണച്ചിലവ്.കേരളത്തിലെ ഏറ്റവും വലിയ കുടുംബക്ഷേത്രവും ഇതുതന്നെയാണ്.
