കന്യാകുമാരി: നൃത്തസംഘം സഞ്ചരിച്ച കാര്‍ ബസുമായി കൂട്ടിയിടിച്ച് നാലു പേര്‍ മരിച്ചു. ഏഴു പേര്‍ക്ക് ഗുരുതരമായി പരുക്കേറ്റു. ഇന്നു രാവിലെ നാഗര്‍കോവില്‍ തിരുനെല്‍വേലി ദേശീയപാതയില്‍ വെള്ളമടം എന്ന സ്ഥലത്തു വച്ചാണ് അപകടമുണ്ടായത്. ഇവര്‍ സഞ്ചരിച്ചിരുന്ന കാര്‍, സര്‍ക്കാര്‍ ബസുമായി കൂട്ടിയിടിക്കുകയായിരുന്നു.
തൃച്ചന്തൂര്‍ ഭാഗത്ത് നൃത്തപരിപാടിയില്‍ പങ്കെടുത്ത ശേഷം മടങ്ങുകയായിരുന്ന സംഘം സഞ്ചരിച്ച വാഹനമാണ് അപകടത്തില്‍പെട്ടത്. നൃത്തപരിപാടിക്കു ശേഷം രാവിലെ അഞ്ച് മണിയോടെയാണ് ഇവര്‍ മടങ്ങിയത്. വാഹനത്തിനുള്ളില്‍ 11 പേരാണ് ഉണ്ടായിരുന്നത്. ഇതില്‍ 10 പേര്‍ കന്യാകുമാരി സ്വദേശികളും ഒരാള്‍ മലയാളിയുമാണെന്നാണ് വിവരം. അപകടത്തില്‍പ്പെട്ടവരുടെ പേരുവിവരങ്ങള്‍ ലഭ്യമായിട്ടില്ല.
കാര്‍ ഡ്രൈവര്‍ ഉള്‍പ്പെടെ നാലു പേര്‍ സംഭവസ്ഥലത്തു തന്നെ മരിച്ചു. കാര്‍ ഡ്രൈവര്‍ ഉറങ്ങിപ്പോയതാണ് അപകടത്തിനു കാരണമായതെന്നാണ് പ്രാഥമിക വിവരം.
