എറണാകുളം: ഫെയ്‌സ്ബുക്ക് പരാമര്‍ശത്തിന്റെ പേരില്‍ യുവാവിനെയും ഭാര്യയെയും വീട്ടില്‍ക്കയറി ആക്രമിച്ച കേസില്‍ രണ്ടുപേര്‍ പിടിയിലായി. ഏനാനല്ലൂര്‍ പടിഞ്ഞാറേ പുന്നമറ്റം നടേപ്പറമ്പില്‍ റിയാസ് (28), ഓണേലിക്കുടിയില്‍ നിഷാദ് (36) എന്നിവരെ പോത്താനിക്കാട് പോലീസാണ് അറസ്റ്റ് ചെയ്തത്.
വെങ്ങോല സ്വദേശി ഷിഹാബ് അലിക്കാണ് ആക്രമണത്തില്‍ പരിക്കേറ്റത്. തടയാന്‍ചെന്ന ഷിഹാബിന്റെ ഭാര്യയെയും ആക്രമിച്ചു.
സംഭവത്തില്‍ പോലീസ് പറയുന്നത്: ഷിഹാബിന്റെ ഭാര്യാസഹോദരന്‍ റഷീദ് ഫെയ്‌സ്ബുക്കില്‍ കണ്ട ഫോട്ടോയിലിട്ട പരാമര്‍ശമാണ് പ്രശ്‌നങ്ങളുടെ തുടക്കം. പ്രതികളുമായി ഇത് സംഘര്‍ഷത്തില്‍ എത്തുകയും അന്ന് മര്‍ദനത്തില്‍ റഷീദിന് പരിക്കേല്‍ക്കുകയും ചെയ്തിരുന്നു. ഇത് ചോദ്യംചെയ്തതിലുള്ള വൈരാഗ്യമാണ് വീടുകയറിയുള്ള ആക്രമണത്തിന് കാരണമായത്. പുന്നമറ്റത്തുള്ള റഷീദിന്റെ വാടകവീട്ടില്‍ക്കയറി ഷിഹാബിനെ ആക്രമിക്കുകയായിരുന്നു.
