എപ്പോഴും ചിരിച്ച മുഖത്തോടെ പ്രേക്ഷകര്‍ക്ക് മുന്നില്‍ എത്തുന്ന സുബി സുരേഷിന്റെ മരണവാര്‍ത്ത ഇന്നലെ രാവിലെയാണ് പുറത്തുവന്നത്. കരള്‍ സംബന്ധമായ അസുഖത്തെ തുടര്‍ന്ന് ചികിത്സയില്‍ കഴിയുന്നതിനിടെ ആയിരുന്നു മരണം. സോഷ്യല്‍ മീഡിയയില്‍ സജീവമായ സുബി തന്റെ യൂട്യൂബ് ചാനല്‍ വഴി വിശേഷങ്ങള്‍ പങ്കുവെച്ച് എത്താറുണ്ട്. തന്റെ വീഡിയോയിലും എപ്പോഴും ചിരിപ്പിച്ചു കൊണ്ടാണ് സുബി എത്താറ്. 2 ലക്ഷത്തിലധികം സബ്സ്‌ക്രൈബേഴ്സ് ആണ് സുബിക്ക് ഉള്ളത്.
തന്റെ ചാനല്‍ വഴി സുബി അവസാനമായി ഒരു വീഡിയോ പോസ്റ്റ് ചെയ്തിരുന്നു. രണ്ട് ആഴ്ചകള്‍ക്കു മുമ്പായിരുന്നു ഇത് പോസ്റ്റ് ചെയ്തത്. അതേസമയം, രണ്ടുവര്‍ഷം മുമ്പാണ് സ്വന്തമായി യൂട്യൂബ് ചാനല്‍ ആരംഭിച്ചത്. ഇതിലൂടെ താരം പങ്കുവെക്കുന്ന ഒട്ടുമിക്ക വീഡിയോസും വൈറല്‍ ആവാറുണ്ട്. പാചക പരീക്ഷണവും യാത്രകളും തന്റെ കൃഷിയിടമെല്ലാം സുബി ഇതിലൂടെ പരിചയപ്പെടുത്തിയിട്ടുണ്ട്.
ഇപ്പോഴിതാ ഏറ്റവും ഒടുവില്‍ സുബി പങ്കുവെച്ച വീഡിയോ വൈറല്‍ ആവുകയാണ്. ഇതിലും കളിച്ചു ചിരിച്ചുകൊണ്ടാണ് സുബി എത്തിയത് . ഝാര്‍ഖണ്ഡില്‍ പ്രോഗ്രാമിന് പോയപ്പോള്‍ ചിത്രീകരിച്ച മൂന്ന് വീഡിയോകളാണ് ഈ ചാനലില്‍ അവസാനമായി വന്നത്. റാഞ്ചി കൈരളി സ്‌കൂള്‍ മലയാളി അസോസിയേഷന്‍ സംഘടിപ്പിച്ച പ്രോഗ്രാമിനായാണ് സുബിയും സംഘവും എത്തിയത്.
സാജന്‍ പള്ളുരുത്തി, ജയദേവ്, രാഹുല്‍ അടക്കം ഏഴുപേരാണ് സംഘത്തില്‍ ഉണ്ടായിരുന്നത്. 3 മണിക്കൂര്‍ ദൈര്‍ഘ്യമുള്ള പരിപാടിയായിരുന്നു അവിടെ നടത്തിയത്. തിരക്കുകള്‍ കാരണമാണ് വീഡിയോകള്‍ തുടര്‍ച്ചയായി വരാത്തതെന്നും ഇനി മികച്ച വീഡിയോകള്‍ ഉണ്ടാവുമെന്നും സുബി അന്ന് പറഞ്ഞു.
