ഒറ്റനോട്ടത്തില്‍ ശോഭന തന്നെ; രണ്ടാമത്തെ നോട്ടത്തിലും…നടിയുമായി അമ്പരപ്പിക്കുന്ന രൂപസാദൃശ്യവുമായി അപര
ബാലചന്ദ്ര മേനോന്‍ സംവിധാനം ചെയ്ത ‘ഏപ്രില്‍ 18’ എന്ന സിനിമയിലൂടെ അഭിനയലോകത്തേക്ക് എത്തിയ താരമാണ് ശോഭന. മലയാളത്തിലും, തമിഴിലും തെലുങ്കിലും ഒരേസമയം താരപദവിയോടെ നിറഞ്ഞുനിന്ന ശോഭന, നൃത്തരംഗത്തുനിന്നുമാണ് അഭിനയലോകത്തേക്ക് എത്തിയത്. ശോഭനയ്ക്ക് ശേഷം എന്ന് പറയാവുന്ന ഒരു നായികയെ ഇന്നുവരെ മലയാളത്തിന് ലഭിച്ചിട്ടില്ല എന്നാണ് ആരാധകരുടെ പക്ഷം. എന്നാല്‍, ഇപ്പോഴിതാ, ശോഭനയുമായി അസാധാരണമായ രൂപസാദൃശ്യമുള്ള യുവതിയുടെ വീഡിയോ സമൂഹമാധ്യമങ്ങളില്‍ ശ്രദ്ധ നേടുകയാണ്.
കര്‍ണാടിക് ഗായിക ശിവശ്രീ സ്‌കന്ദയാണ് ശോഭനയുമായുള്ള അസാമാന്യ രൂപസാദൃശ്യവുമായി അമ്പരപ്പിക്കുന്നത്. ശോഭനയുടെ പഴയകാല ലുക്കാണ് വീഡിയോയില്‍ ശിവശ്രീ സ്‌കന്ദയ്ക്ക്. നിരവധി ആളുകള്‍ നടിയുമായുള്ള സാദൃശ്യം ചൂണ്ടിക്കാണിച്ചുകൊണ്ട് രംഗത്ത് എത്തി. ഗായികയായ ശിവശ്രീ തമിഴ്നാട് സ്വദേശിയാണ്. അതോടൊപ്പം നര്‍ത്തകിയുമാണ്.
https://www.instagram.com/reel/Cm_AKS0rslf/?utm_source=ig_web_button_share_sheet
അതേസമയം, നൃത്തത്തിനും അഭിനയത്തിനും അപ്പുറം ധാരാളം അഭിരുചികളും ഇഷ്ടങ്ങളും കാത്തുസൂക്ഷിക്കുന്ന ആളാണ് ശോഭന. ചെന്നൈയില്‍ കലാര്‍പ്പണ എന്ന നൃത്ത വിദ്യാലയവുമായി സജീവമാണ് ശോഭന. ധാരാളം വിദ്യാര്‍ത്ഥികള്‍ ശോഭനയുടെ കീഴില്‍ നിരവധി നൃത്തരൂപങ്ങള്‍ അഭ്യസിക്കുന്നുണ്ട്. നൃത്ത വിദ്യാലയത്തില്‍ ശ്രദ്ധ ചെലുത്തുന്നതിനാല്‍ ചെന്നൈ കേന്ദ്രീകരിച്ചുള്ള സിനിമകളില്‍ മാത്രമേ ശോഭന ഇപ്പോള്‍ അഭിനയിക്കാറുള്ളു. വരനെ ആവശ്യമുണ്ട് എന്ന സിനിമയുടെ ചിത്രീകരണവും ചെന്നൈയിലേക്ക് മാറ്റിയത് ശോഭന അതിലുണ്ടാകണം എന്ന നിര്‍ബന്ധം സംവിധായകനായ അനൂപ് സത്യന് ഉണ്ടായിരുന്നതിനാലാണ്.
