ജനറല് സെക്രട്ടറി നായര് സമുദായത്തിന് നാണക്കേട്, കട്ടപ്പയായി മാറി, പിണറായിക്ക് പാദസേവ ചെയ്യുന്നു; സുകുമാരന് നായര്ക്കെതിരെ വെട്ടിപ്പുറത്ത് ബാനര്
പത്തനംതിട്ട: എന്എസ്എസ് കരയോഗത്തിന് മുന്നില് ജനറല് സെക്രട്ടറി ജി സുകുമാരന് നായര്ക്കെതിരെ ബാനര്. പത്തനംതിട്ട വെട്ടിപ്പുറം എന്എസ്എസ് കരയോഗം ഓഫീസിന് മുന്നിലാണ് ബാനര്. എന്എസ്എസ് ജനറല് സെക്രട്ടറി സമുദായത്തിന് നാണക്കേടാണെന്നും കുടുംബ കാര്യത്തിനുവേണ്ടി അയ്യപ്പ ഭക്തരെ പിന്നില് നിന്ന് കുത്തിയെന്നും ബാനറില് പറയുന്നു.
ജനറല് സെക്രട്ടറി പിണറായിക്ക് പാദസേവ ചെയ്യുകയാണ്. ജനറല് സെക്രട്ടറി കട്ടപ്പയായി മാറിയെന്നും ബാനറില് പരിഹസിക്കുന്നു. ആരാണ് ബാനര് കെട്ടിയത് എന്നത് സംബന്ധിച്ച് വ്യക്തതയില്ല. ഇന്ന് രാവിലെയാണ് ബാനര് പ്രത്യക്ഷപ്പെട്ടത്. ശബരിമല വിഷയത്തില് എന്എസ്എസ് എല്ഡിഎഫിനൊപ്പമാണെന്ന് ജനറല് സെക്രട്ടറി ജി സുകുമാരന് നായര് പറഞ്ഞിരുന്നു. അയ്യപ്പ സംഗമം ബഹിഷ്കരിച്ച കോണ്ഗ്രസിനെ വിമര്ശിച്ച സുകുമാരന് നായര് കോണ്ഗ്രസിന് ഹിന്ദു വോട്ട് വേണ്ടെന്നും ശബരിമലയില് ആചാരം സംരക്ഷിക്കാന് കേന്ദ്രം ഒന്നും ചെയ്യുന്നില്ലെന്നും ആരോപിച്ചിരുന്നു.
എല്ഡിഎഫ് സര്ക്കാര് ആചാരം സംരക്ഷിക്കാന് നടപടി എടുക്കുകയാണ്. ശബരിമലയിലെ ആചാരം സംരക്ഷിക്കുക എന്നതാണ് ലക്ഷ്യം. സ്ത്രീപ്രവേശന വിധിക്കെതിരെ എന്എസ്എസ് നാമജപ ഘോഷയാത്ര നടത്തി. കോണ്ഗ്രസും ബിജെപിയും അന്ന് വിട്ടുനിന്നു. വിശ്വാസികള് കൂട്ടത്തോടെ വന്നപ്പോഴാണ് അവരും വന്നത്. എല്ഡിഎഫ് സര്ക്കാര് സ്ത്രീപ്രവേശനം അനുവദിച്ചില്ല. അവര്ക്ക് വേണമെങ്കില് അത് ചെയ്യാമായിരുന്നു.
ആചാരങ്ങള് അതേ പോലെ നിലനിര്ത്തി. കേന്ദ്രത്തിലെ ബിജെപി സര്ക്കാര് ഒന്നും ചെയ്തില്ല. കോണ്ഗ്രസും ഒന്നും ചെയ്തില്ല. ശബരിമലയിലെ പ്രശ്നം പരിഹരിക്കുമെന്നും ആചാരങ്ങള് സംരക്ഷിക്കുമെന്നും എന്എസ്എസിന് സര്ക്കാര് ഉറപ്പു നല്കിയിട്ടുണ്ട്. എല്ഡിഎഫ് സര്ക്കാര് ആചാരത്തിനെതിരെ ഒന്നും ചെയ്യില്ല. മുഖ്യമന്ത്രിയുടെ അറിവോടെ ദേവസ്വം മന്ത്രിയാണ് ഉറപ്പുനല്കിയതെന്നും സുകുമാരന് നായര് പറഞ്ഞിരുന്നു.
