‘ഇച്ചാക്കയ്ക്കൊരു ഉമ്മയുമായി മോഹന്ലാല്’; രോഗംമാറി മലയാളത്തിന്റെ മഹാനടന് മമ്മൂട്ടി അഭിനയരംഗത്തേക്ക് തിരിച്ചെത്തുന്നു; മമ്മൂട്ടി പൂര്ണ ആരോഗ്യവാനായെന്ന് ഡോക്ടര്മാര്
കൊച്ചി: കേരളം കാത്തിരുന്ന ആ വാര്ത്തയെത്തി, രോഗംമാറി മലയാളത്തിന്റെ മഹാനടന് മമ്മൂട്ടി അഭിനയരംഗത്തേക്ക് തിരിച്ചെത്തുന്നു. മമ്മൂട്ടി പൂര്ണ ആരോഗ്യവാനായെന്ന് ഡോക്ടര്മാര് സാക്ഷ്യപ്പെടുത്തി. ചൊവ്വാഴ്ച രാവിലെയോടെയാണ് എല്ലാ ടെസ്റ്റുകളുടെയും ഫലം പുറത്തുവന്നത്. ചികിത്സ കഴിഞ്ഞ് ചെന്നൈയില് നിന്ന് കേരളത്തിലേക്ക് തിരിച്ചെത്തുന്ന മമ്മൂട്ടി അടുത്ത മാസം തന്നെ, മഹേഷ് നാരായണ് സംവിധാനം ചെയ്യുന്ന പുതിയ ചിത്രത്തില് അഭിനയിക്കുമെന്നാണ് സൂചന.
നിര്മാതാവ് ആന്റോ ജോസഫാണ് മമ്മൂട്ടി മടങ്ങിയെത്തുന്ന വാര്ത്ത സാമൂഹിക മാധ്യമത്തിലൂടെ ആദ്യം അറിയിച്ചത്. ”ലോകമെമ്പാടുമുള്ള ഒരുപാട് പേരുടെ പ്രാര്ഥന ഫലം കണ്ടു. ദൈവമേ, നന്ദി, നന്ദി, നന്ദി…” എന്നായിരുന്നു മമ്മൂട്ടിയുടെ രോഗമുക്തിയെക്കുറിച്ച് ആന്റോ കുറിച്ചത്. പറഞ്ഞാല് തീരാത്ത സ്നേഹത്തോടെ നന്ദി പറഞ്ഞ് മമ്മൂട്ടിയുടെ സന്തതസഹചാരി ജോര്ജും സാമൂഹിക മാധ്യമത്തില് കുറിപ്പിട്ടു.
ഒരൊറ്റ വാക്കുമില്ലാതെ, രണ്ട് ഇമോജി സഹിതം ഒന്നിച്ചുള്ള ഒരു ചിത്രമാണ് മോഹന്ലാല് പങ്കുവെച്ചത്. മമ്മൂട്ടിയെ ലാല് ചുംബിക്കുന്ന ഈ ചിത്രത്തിനുതാഴെ സന്തോഷത്തോടെ ഒരുപാട് പേര് കമന്റ് ചെയ്തിട്ടുണ്ട്. ‘വെല്കം ബാക്ക് ടൈഗര്’ എന്ന് മഞ്ജുവാരിയര് കുറിച്ചപ്പോള് ‘എല്ലാം ഓകെ ആണ്’ എന്നായിരുന്നു രമേഷ് പിഷാരടി കുറിച്ചത്.
‘ചീഫ്’ എന്ന് വിശേഷിപ്പിച്ച് ടൊവിനോ തോമസ് മമ്മൂട്ടിയുടെ തിരിച്ചുവരവ് ആഘോഷിച്ചപ്പോള് ‘രാജാവ് തിരിച്ചെത്തിയിരിക്കുന്നു’ എന്ന ആവേശക്കുറിപ്പാണ് മാലാപാര്വതി പങ്കുവെച്ചത്. ‘സിനിമ വിട്ട് താങ്കള് എവിടെപ്പോകാന്, അത്രമേല് താങ്കള് സിനിമയെ സ്നേഹിക്കുന്നുവല്ലോ’ എന്നായിരുന്നു ജോയ് മാത്യുവിന്റെ കുറിപ്പ്.
‘എണ്ണിയാലൊടുങ്ങാത്ത പ്രാര്ഥനകളുടെ പിന്ബലത്തില് ജീവിതത്തിലേക്ക് തിരിച്ചുവരുന്നൊരാളുടെ ആശ്വാസം നന്നായറിയുന്നയാളല്ലേ ഞാന്’ എന്ന ഉമാ തോമസ് എംഎല്എയുടെ കുറിപ്പും വൈകാരികമായിരുന്നു. കേള്ക്കാനായി കാതോര്ത്തു പ്രാര്ഥനയോടെ കാത്തിരുന്ന സന്തോഷവാര്ത്ത എന്ന സിബി മലയിലിന്റെ കുറിപ്പും കേരളം മമ്മൂട്ടിയുടെ തിരിച്ചുവരവിനെ എത്രമേല് കാത്തിരുന്നുവെന്നതിന്റെ സാക്ഷ്യ പത്രമാണ്.
