രാഹുലിനെ അമേഠിയില് വീഴ്ത്തിയ ബി.ജെ.പിയുടെ പെണ്പുലി! മോദിയുടെ വിശ്വസ്തയ്ക്ക് എന്തു സംഭവിച്ചു? സ്മൃതി ബി.ജെ.പി വിടുമോ? തല്ക്കാലം മുഖത്ത് ചായംപൂശി ക്യാമറയ്ക്ക് മുന്നില്
മുംബൈ: അമേഠിയില് കോണ്ഗ്രസ് സ്ഥാനാര്ത്ഥി കിഷോരി ലാല് ശര്മ്മയോട് 2024 ലോക്സഭാ തിരഞ്ഞെടുപ്പില് പരാജയപ്പെട്ടതോടെ രാഷ്ട്രീയത്തിന് താത്കാലിക വിരാമമിട്ട് പഴയ സീരിയല് അഭിനേതാവായി തിരിച്ചെത്തി ബി.ജെ.പി നേതാവും മുന് കേന്ദ്രമന്ത്രിയുമായ സ്മൃതി ഇറാനി. സ്മൃതിയെ പ്രശസ്തയാക്കിയ 2000കളിലെ ഹിറ്റ് ‘ക്യോം കീ സാസ് ഭീ കഭി ബഹൂ ഥീ'(എന്തുകൊണ്ടെന്നാല് അമ്മായി അമ്മയും ഒരിക്കല് വധു ആയിരുന്നു) സീരിയലിലെ ‘തുളസി വിരാനി’ എന്ന കഥാപാത്രമായാണ് തിരിച്ചെത്തുന്നത്. നിര്മ്മാതാവ് ഏകതാ കപൂറിന്റെ സീരിയല് 28 മുതല് രാത്രി 10.30ന് സ്റ്റാര് പ്ളസ് ടിവിയില് പുനഃരാരംഭിക്കും.
സീരിയലിന്റെ ഫസ്റ്റ് ലുക്ക് പോസ്റ്റര് കഴിഞ്ഞ ദിവസം പുറത്തിറങ്ങി. 2000-2008 കാലത്ത് പ്രക്ഷേപണം ചെയ്ത ടിവി സീരിയല് പ്രേക്ഷക പ്രീതിയില് തുടര്ച്ചയായി ഏഴ് വര്ഷം ഒന്നാമതായിരുന്നു. 2025 ജൂലായ് മൂന്നിന് സീരിയല് തുടങ്ങിയതിന്റെ 25 വാര്ഷികമായിരുന്നു. സ്മൃതിക്ക് ഒരു എപ്പിസോഡിന് 14 ലക്ഷം വീതം പ്രതിഫലമുണ്ടെന്നാണ് വിവരം. ആദ്യകാലത്ത് എപ്പിസോഡിന് 1,800 രൂപയായിരുന്നു പ്രതിഫലം.
പഞ്ചാബി-ബംഗാളി വേരുകളുള്ള സ്മൃതി മോഡലായാണ് കരിയര് തുടങ്ങിയത്. കുടുംബ സദസുകളെ സ്വാധീനിച്ച ‘ക്യോം കീ സാസ് ബി കഭി ബഹു ഥീ’ എന്ന സീരിയിലെ തുളസി എന്ന നായിക കഥാപാത്രം അവരുടെ കരിയര് മാറ്റി മറിച്ചു. ഏകതാ കപൂറുമായുള്ള അഭിപ്രായ വ്യത്യാസത്തെ തുടര്ന്ന് 2007ല് സ്മൃതി പിന്മാറിയപ്പോള് ആ റോളില് ഗൗതമി കപൂര് വന്നിരുന്നു. പ്രശ്നങ്ങള് പരിഹരിച്ച് തിരിച്ചെത്തിയ സ്മൃതി 2008 നവംബറില് സീരിയല് അവസാനിക്കുന്നതു വരെ തുടര്ന്നു. 2001ല് വ്യവസായി സുബിന് ഇറാനിയെ വിവാഹം കഴിച്ചു.
ആര്.എസ്.എസ് കുടുംബ പാരമ്പര്യമുള്ള സ്മൃതി 2003മുതല് ബി.ജെ.പിയിലും സജീവമായിരുന്നു. ബി.ജെ.പി മഹാരാഷ്ട്ര യുവജന വിഭാഗം വൈസ് പ്രസിഡന്റ്, ബി.ജെ.പി കേന്ദ്ര എക്സിക്യൂട്ടീവ് അംഗം, ദേശീയ സെക്രട്ടറി, മഹിളാ മോര്ച്ച അഖിലേന്ത്യാ പ്രസിഡന്റ് എന്നീ പദവികളും വഹിച്ചു. 2011ല് ഗുജറാത്തില് നിന്ന് രാജ്യസഭയിലെത്തി. 2014 ലോക്സഭാ തിരഞ്ഞെടുപ്പില് ഡല്ഹിയില് നിന്ന് പരാജയപ്പെട്ടെങ്കിലും രാജ്യസഭാ എംപിയെന്ന നിലയില് ആദ്യ മോദി സര്ക്കാരില് മന്ത്രിയായി. 2019 ല് രാഹുല് ഗാന്ധിയെ അമേഠിയില് തോല്പ്പിച്ച് പാര്ട്ടിയില് സ്വാധീനമുള്ള നേതാവായി മാറിയെങ്കിലും 2024ലെ തോല്വി തിരിച്ചടിയായി. അഭിനയം 2029 തിരഞ്ഞെടുപ്പില് ശക്തമായി തിരിച്ചുവരുന്നതിന്റെ മുന്നോടിയായുള്ള ഇടവേള മാത്രമാണെന്നാണ് സ്മൃതിയുമായി അടുപ്പമുള്ളവര് പറയുന്നത്.
