മലപ്പുറം: മോഷണം പോയ സ്കൂട്ടര് മാസങ്ങള്ക്ക് ശേഷം ഫുള്ടാങ്ക് പെട്രോളോടെ, പുത്തന് ടയറോടെയും കണ്ടുകിട്ടിയതിന്റെ അമ്പരപ്പിലാണ് ഉടമ കെ.പി ഷാഫി. മലപ്പുറം വടക്കേമണ്ണയിലാണ് സംഭവം. വടക്കേമണ്ണ എച്ച്എംസി ഡെക്കറേഷന് ജീവനക്കാരനായ വാഹനഉടമ കെ പി ഷാഫി, മറ്റൊരു ജീവനക്കാരനായ ബാവ എന്നിവര് ഡിസംബര് അവസാന ആഴ്ച നമസ്കാര സമയം ടൗണ് മസ്ജിദിലേക്ക് പോയ സമയത്താണ് വാഹനം മോഷണം പോയത്. മോഷണ സമയം കുറച്ച് പെട്രോള് മാത്രമേ ആക്ടീവ സ്കൂട്ടറില് ഉണ്ടായിരുന്നുള്ളു.
മോഷണം പോയതറിഞ്ഞ ശേഷം ഷാഫി പൊലീസില് പരാതി നല്കി. അടുത്തുള്ള സ്ഥാപനത്തിലെ സിസിടിവി പരിശോധിച്ചപ്പോള് ഒരു യുവാവ് ഒതുക്കുങ്ങല് ഭാഗത്തുകൂടി സ്കൂട്ടര് ഓടിച്ചുപോകുന്നത് കണ്ടു. എന്നാല് അന്വേഷണത്തില് സ്കൂട്ടര് കണ്ടെത്താനായില്ല. രണ്ട് മാസത്തിന് ശേഷം തിങ്കളാഴ്ച രാവിലെ കട തുറക്കാന് എത്തിയപ്പോഴാണ് സ്കൂട്ടര് കടയുടെ മുന്നില് കണ്ടത്.
തുടര്ന്ന് അടുത്തുള്ള സിസിടിവി പരിശോധിച്ചപ്പോള് തലേന്ന് രാത്രി 10.27ന് മലപ്പുറം ഭാഗത്തുനിന്നും സ്കൂട്ടര് ഓടിച്ചുവന്ന ഒരു യുവാവ് വാഹനം സ്ഥാപനത്തിന് മുന്നില് വച്ചശേഷം ഓടിപ്പോകുന്നതാണ് കണ്ടത്. വാഹനം പരിശോധിച്ചപ്പോള് ഫുള്ടാങ്ക് പെട്രോളും പിറകില് പുതിയ ടയറുമുണ്ട്. ചെറിയ കേടുപാടുകളുമുണ്ട്. എന്നാല് ഫുള്ടാങ്ക് പെട്രോളിന് പകരം വാഹനം എന്തെങ്കിലും നിയമലംഘനത്തിന് ഉപയോഗിച്ചോ എന്ന് ഷാഫിയ്ക്ക് ആശങ്കയുണ്ട്.
