തിരുവനന്തപുരം: പെരുമാതുറയില്‍ കഞ്ചാവ് മാഫിയ വീട് അടിച്ച് തകര്‍ത്തു. അക്രമികള്‍ വീട്ടുകാരെയും ആക്രമിച്ചു. വീട്ടുകാര്‍ കഠിനംകുളം പൊലീസില്‍ പരാതി നല്‍കി. പുതുക്കുറിച്ചി സ്വദേശി നദീറയുടെ വീടാണ് അടിച്ചുതകര്‍ത്തത്.
കഞ്ചാവ് വലിക്കുന്നത് ചോദ്യം ചെയ്തതാണ് അക്രമത്തിന് കാരണമെന്ന് വീട്ടുകാര്‍ പറയുന്നു. സമീപവാസികളായ ഷിബിന്‍, നിബിന്‍, കൈഫ് എന്നിവരാണ് വീട് ആക്രമിച്ചത്. ഇന്നലെ ഉച്ചയ്ക്ക് രണ്ട് മണിയോടെ ആളില്ലാത്ത സമയത്ത് വീട്ടിന്റെ മതില്‍ ചാടി കടന്നായിരുന്നു ആക്രമണം. ബഹളം കേട്ട് ഓടിയെത്തിയ നദീറയെ ഇവര്‍ ചീത്തവിളിക്കുകയും ആക്രമിക്കുകയും ചെയ്തു.
സംഭവത്തെ തുടര്‍ന്ന് വീട്ടുകാര്‍ കഠിനംകുളം പൊലീസില്‍ പരാതി നല്‍കി. പരാതി നല്‍കിയതറിഞ്ഞ സംഘം രാത്രി 8 മണിയോടെ വീട്ടിലെത്തി ജനലുകളും കസേരകളും അടിച്ചു. സംഭവത്തില്‍ പൊലീസ് അന്വേഷണം ആരംഭിച്ചു. നിരവധി കേസുകള്‍ പ്രതികളാണ് അക്രമികളെന്ന് പൊലീസ് പറഞ്ഞു.
