ഗുവാഹത്തി: ഇന്ത്യന്‍ സൂപ്പര്‍ ലീഗില്‍ നോര്‍ത്ത് ഈസ്റ്റ് യുണൈറ്റഡിനെതിരെ വമ്പന്‍ വിജയവുമായി മോഹന്‍ ബഗാന്‍ സൂപ്പര്‍ ജയന്‍റ്സ്.
ഒന്നിനെതിരെ മൂന്ന് ഗോളുകള്‍ക്കാണ് മോഹൻ ബഗാൻ നോര്‍ത്ത് ഈസ്റ്റിനെ തകർത്തത്. മത്സരത്തിന്റെ തുടക്കത്തില്‍ ഒരു ഗോളിന് മുന്നിലെത്തിയെങ്കിലും മോഹൻ ബഗാന്റെ പവർ പ്ലേയ്ക്കു മുന്നിൽ നോര്‍ത്ത് ഈസ്റ്റിന് പിടിച്ച് നിൽക്കാനായില്ല.
ഇതോടെ ഏഴ് മത്സരങ്ങളില്‍ നിന്ന് 19 പോയിന്റുമായി മൂന്നാം സ്ഥാനത്താണ് മോഹന്‍ ബഗാന്‍. ആറ് വിജയവും ഒരു സമനിലയുമാണ് മോഹന്‍ ബഗാന്റെ അക്കൗണ്ടിലുള്ളത്. പത്ത് മത്സരങ്ങളില്‍ നിന്ന് പത്ത് പോയിന്റുള്ള നോര്‍ത്ത് ഈസ്റ്റ് യുണൈറ്റഡ് പട്ടികയില്‍ ഏഴാമതാണ്.
അതേസമയം പത്ത് മത്സരങ്ങളിൽ നിന്ന് 20 പോയിന്റുള്ള കേരള ബ്ലാസ്റ്റേഴ്സ് രണ്ടാമതും 8 മത്സരങ്ങളിൽ നിന്ന് 6 വിജയവും 2 സമനിലയുമായി 20 പോയിന്റോടെ ഗോവ ഒന്നാം സ്ഥാനത്തും തുടരുന്നു.
മുംബൈയുമായി ഡിസംബർ 24 ന് കൊച്ചിയില്‍ വച്ചാണ് ബ്ലാസ്റ്റേഴ്സിന്റെ അടുത്ത മത്സരം.27 ഡിസംബറിന് കൊല്‍ക്കത്തയില്‍ വച്ച്‌ മോഹൻ ബഗാനുമായും ബ്ലാസ്റ്റേഴ്സ് ഏറ്റുമുട്ടും.
