എറണാകുളം: കളമശേരി ഗവ.മെഡിക്കല്‍ കോളജ് ആശുപത്രിയില്‍ അത്യാഹിത വിഭാഗത്തിനു സമീപം എസ്എഫ്‌ഐ പ്രവര്‍ത്തകര്‍ പൊലീസുകാരെ ആക്രമിച്ചു. കളമശേരി പൊലീസ് സ്റ്റേഷനിലെ പൊലീസുകാരായ അനൂജ് (40), ഷമീര്‍ (38) എന്നിവര്‍ക്കു പരുക്കേറ്റു. ഇവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
ഇന്നലെ വൈകിട്ടു 3 മണിയോടെയായിരുന്നു സംഭവം. രാവിലെ കളമശേരി ഗവ.പോളിടെക്‌നിക് കോളജിലേക്കു നടത്തിയ എസ്എഫ്‌ഐ മാര്‍ച്ചില്‍ പൊലീസുകാരനായ അനൂജിനു കൈവിരലിനു പരുക്കേറ്റിരുന്നു. ആശുപത്രിയില്‍ പ്രവേശിപ്പിച്ച അനൂജിന്റെ കൈവിരലിനു തുന്നിക്കെട്ടുകള്‍ വേണ്ടിവന്നു. ഡിസ്ചാര്‍ജ് ചെയ്ത അനൂജിനെ കൂട്ടിക്കൊണ്ടുപോകാന്‍ ജീപ്പിലെത്തിയതായിരുന്നു ഷമീര്‍.
ഇരുവരും ആശുപത്രിയില്‍ നിന്നു മടങ്ങുംവഴിയാണ് അത്യാഹിത വിഭാഗത്തിനു സമീപത്തു ഇരുവരെയും തടഞ്ഞുനിര്‍ത്തി ആക്രമിച്ചത്. ഷമീറിന്റെ മുഖത്ത് ഇടിയേറ്റു. അനൂജിന്റെ കൈ വീണ്ടും പിടിച്ചു തിരിച്ചതായും പൊലീസ് പറഞ്ഞു.
