പാലക്കാട്: നടിയും റിയാലിറ്റി ഷോ താരവും നര്‍ത്തകിയും സോഷ്യല്‍ മീഡിയ ഇന്‍ഫ്‌ളുവെന്‍സറുമായ മാളവിക കൃഷ്ണദാസിന്റെ വീട്ടില്‍ കവര്‍ച്ച. പാലക്കാട് ഞാങ്ങാട്ടിരിയിലെ വീട്ടിലുണ്ടായ മോഷണത്തില്‍ ഒന്നര ലക്ഷം രൂപയുടെ സാധനങ്ങള്‍ നഷ്ടമായി. സമാന സംഭവം സമൂപത്തെ ഹോളോബ്രിക്‌സ് സ്ഥാപനത്തിലും റിപ്പോര്‍ട്ട് ചെയ്തറ്റുണ്ട്.
കഴിഞ്ഞ കുറച്ച് ദിവസങ്ങളായി മാളവികയും കുടുംബവും ഇവിടെയുണ്ടായിരുന്നില്ല. ഇതിനിടെയില്‍ വീട് വൃത്തിയാക്കാനെത്തിയ ജോലിക്കാരിയാണ് വാതില്‍ തകര്‍ത്തിരിക്കുന്നത് കണ്ടത്. തുടര്‍ന്ന് തൃത്താല പോലീസില്‍ വിവരമറിയിക്കുകയായിരുന്നു. മോഷണം നടത്തിയവര്‍ വീട്ടിലെ വിലകൂടിയ സാധനങ്ങളെല്ലാം വാരിവലിച്ചിട്ട് നശിപ്പിച്ച നിലയിലായിരുന്നു. പ്രാഥമികമായി ഒന്നരലക്ഷത്തിലധികം രൂപയുടെ നഷ്ടം കണക്കാക്കുന്നതായി മാളവിക.
മോഷണത്തില്‍ ഒന്നര ലക്ഷം രൂപ വില വരുന്ന വാച്ച് ഉള്‍പ്പെടെയുളള സാധനങ്ങളാണ് നഷ്ടമായത്. തൊട്ടടുത്ത് വീട്ടിലെ സിസിടിവിയില്‍ മോഷ്ടാവിന്റെ ദൃശ്യങ്ങള്‍ പതിഞ്ഞിട്ടുണ്ട്. പാലക്കാട് നിന്നുള്ള ഡോഗ് സ്‌ക്വാഡും തൃത്താല പോലീസും സ്ഥലത്തെത്തി പരിശോധിച്ചു. രണ്ടിടങ്ങളിലെയും കവര്‍ച്ചയ്ക്ക് പിന്നില്‍ ഒരേ സംഘമെന്നാണ് നിഗമനം.
