കുളത്തൂപ്പുഴയിൽ കിടപ്പുമുറിയിലിട്ട് ഭാര്യയെ വെട്ടിക്കൊലപ്പെടുത്താൻ ശ്രമിച്ച കേസിൽ ഭർത്താവ് പൊലീസ് പിടിയിൽ. കുളത്തൂപ്പുഴ സിലോൺ മുക്ക് സ്വദേശി യോഗേഷാണ് കുളത്തൂപ്പുഴ പൊലീസിന്റെ പിടിയിലായത്. ഗുരുതരമായി പരിക്കേറ്റ ലിസി മെഡിക്കൽ കോളേജ് ആശുപത്രിയിൽ ചികിത്സയിലാണ്.
കുളത്തൂപ്പുഴ സിലോൺ ജംഗഷനിൽ താമസിക്കുകയായിരുന്ന യോഗേഷും ഭാര്യ ലിസിയും തമ്മിൽ ഏറെ നാളുകളായി തർക്കം നിലനിന്നിരുന്നു. കഴിഞ്ഞ ദിവസമാണ് യോഗേഷ്
കത്തി ഉപയോഗിച്ച് ലിസിയെ കിടപ്പുമുറിയിൽ വെച്ച് വെട്ടിക്കൊലപ്പെടുത്താൻ ശ്രമിച്ചത്. ലിസി രക്ഷപ്പെടാതിരിക്കാൻ സംഭവ ശേഷം മുറി പൂട്ടി യോഗേഷ് രക്ഷപ്പെടുകയായിരുന്നു.
ലിസിയുടെ നിലവിളി കേട്ട സമീപവാസി വിവരം അറിയിച്ചതിനെ തുടർന്ന് പൊലീസ് എത്തി ലിസിയെ ആശുപത്രിയിലേക്ക് മാറ്റുകയായിരുന്നു. പിടിയിലായ പ്രതിയെ വീട്ടിലെത്തിച്ച് തെളിവെടുപ്പ് നടത്തി. ഇരുവരും തമ്മിൽ കുടുംബ പ്രശ്നങ്ങൾ നിലനിന്നിരുന്നതായി കുളത്തുപ്പുഴ പൊലീസ് എസ് ഐ അനീഷ് പറഞ്ഞു.
യോഗേഷിന് എതിരെ കൊലപാതക ശ്രമത്തിന് കേസ് എടുത്ത് കോടതിയിൽ ഹാജരാക്കി റിമാൻഡ് ചെയ്തു.
