ബീച്ചില് കാറുമായി പോയി ‘റീല്’ ഉണ്ടാക്കാന് നോക്കി ആകെ പൊല്ലാപ്പായി ; ഡുമാസ് ബീച്ചിലെ കടല്വെള്ളത്തില് ആഡംബര മെഴ്സിഡസ് പൂണ്ടുപോയി; പിന്നാലെ പോലീസ് കേസും എടുത്തു…!!
വാഹനം കടത്തിവിടാന് വിലക്കുള്ള സുറത്തിലെ ഡുമാസ് ബീച്ചില് കടല്വെള്ളത്തില് പൂണ്ടുപോയ ഒരു ആഡംബര കാര് ക്രെയിന് ഉപയോഗിച്ച് പുറത്തെടുത്തു. പ്രദേശത്തെ നിയമലംഘനങ്ങളെക്കുറിച്ചുള്ള ആശങ്കകള് വീണ്ടും വര്ദ്ധിപ്പിച്ചു. മണലില് കുടുങ്ങിയ ചുവന്ന മെഴ്സിഡസ് സെഡാന് ക്രെയിന് ഉപയോഗിച്ച് വലിച്ചുനീക്കുന്നതിന്റെ ക്ലിപ്പ് സോഷ്യല് മീഡിയയില് അതിവേഗം വൈറലായി. ഇതിനെത്തുടര്ന്ന് പ്രാദേശിക അധികാരികള് ഉടന് നടപടിയെടുത്തു.
വാഹനങ്ങള്ക്ക് പ്രവേശനം കര്ശനമായി നിരോധിച്ചിട്ടുണ്ടെങ്കിലും, ഡുമാസ് ബീച്ചില് നിയമലംഘനങ്ങള് ആവര്ത്തിക്കുകയാണ്. പ്രത്യേകിച്ച് വേലിയേറ്റ സമയത്തും മഴയ്ക്ക് ശേഷവും നിരവധി കാറുകള് മണലില് കുടുങ്ങുന്നത് ഇവിടെ പതിവാണ്. ഏറ്റവും പുതിയ സംഭവത്തില്, ഒരു വ്യക്തി തന്റെ ഹൈ-എന്ഡ് മെഴ്സിഡസ് കാര് ബീച്ചിലേക്ക് ഓടിച്ചു കയറ്റുകയായിരുന്നു.
റീല് ചിത്രീകരിക്കുന്നതിനിടെയാണ് കാര് ഓടിച്ചതെന്നാണ് റിപ്പോര്ട്ട്. തുടര്ന്ന്, വാഹനം കടല്ത്തീരത്തോട് ചേര്ന്നുള്ള മണലില് പെട്ടെന്ന് കുടുങ്ങി. വാഹനം മാറ്റാനുള്ള ശ്രമങ്ങള് വിജയിച്ചില്ലെന്നും, ഒരു ക്രെയിന് കൊണ്ടുവന്നാണ് കാര് പുറത്തെടുത്തതെന്നും ദൃക്സാക്ഷികള് അറിയിച്ചു. വൈറലായ ഈ വീഡിയോ ഓണ്ലൈനില് വലിയ പ്രതിഷേധത്തിന് ഇടയാക്കി. ഉടന് തന്നെ സുറത്ത് പോലീസ് പ്രതികരിച്ചു. ഡ്രൈവറെ കസ്റ്റഡിയിലെടുക്കുകയും നിയമനടപടികള് ആരംഭിക്കുകയും ചെയ്തു.
ഒരു ഔദ്യോഗിക പ്രസ്താവനയില്, അസിസ്റ്റന്റ് കമ്മീഷണര് ഓഫ് പോലീസ് ദീപ് വക്കീല് പറഞ്ഞതിങ്ങനെ: ‘ഡ്രൈവറുടെ ലൈസന്സ് റദ്ദാക്കാന് ഞങ്ങള് റീജിയണല് ട്രാന്സ്പോര്ട്ട് ഓഫീസിനോട് ശുപാര്ശ ചെയ്യുന്നു. സംഭവവുമായി ബന്ധപ്പെട്ട ഇന്ഷുറന്സ് ക്ലെയിമുകള് നിരസിക്കപ്പെടുന്നുവെന്ന് ഉറപ്പാക്കാന് ഇന്ഷുറന്സ് കമ്പനിയെ വിവരമറിയിക്കാനും ഞങ്ങള് പദ്ധതിയിടുന്നു.’ ഡുമാസ് ബീച്ച് വാഹനങ്ങള്ക്ക് നിയന്ത്രിത മേഖലയാണെന്ന് പോലീസ് വീണ്ടും ഓര്മ്മിപ്പിച്ചു.
തുടര്ന്ന് നിയമം കൂടുതല് കര്ശനമാക്കുമെന്നും അധികൃതര് മുന്നറിയിപ്പ് നല്കി. പൊതു സുരക്ഷാ നിയമങ്ങള് പാലിക്കണമെന്നും ഇത്തരം അശ്രദ്ധമായ പെരുമാറ്റം ഒഴിവാക്കണ മെന്നും അവര് പൗരന്മാരോട് അഭ്യര്ത്ഥിച്ചു. ഈ വര്ഷം സുറത്തില് നടക്കുന്ന രണ്ടാമത്തെ സംഭവമാണിത്. സമാനമായ ഒരു സംഭവം ജൂലൈയിലും നടന്നിരുന്നു.
അന്നും ഒരു മെഴ്സിഡസ് എസ്.യു.വി. ഡ്രൈവര് നിയമങ്ങള് ലംഘിച്ച് കാര് കടലിലേക്ക് ഓടിച്ചപ്പോള്, മഴയെ തുടര്ന്ന് തീരം ചെളി നിറഞ്ഞതിനാല് വാഹനം കുടുങ്ങുകയായിരുന്നു. ആ ഡ്രൈവറും സ്റ്റണ്ടുകള്ക്ക് ശ്രമിക്കുന്നതിനിടെയാണ് എസ്.യു.വി. പകുതിയും മണലില് പൂണ്ടുപോയതെന്നാണ് റിപ്പോര്ട്ട്.
