ബീഹാറിലെ തെരഞ്ഞെടുപ്പിന് കര്ശന നിര്ദേശവുമായി തെരഞ്ഞെടുപ്പ് കമ്മീഷന് ; തെരഞ്ഞെടുപ്പ് പ്രചരണത്തിന് എഐ നിര്മ്മിത വീഡിയോകള് ഉപയോഗിക്കാന് അനുവദിക്കില്ല
പാറ്റ്ന: ബീഹാറില് നിയമസഭാ തെരഞ്ഞെടുപ്പ് നടക്കാനിരിക്കെ എഐ നിര്മ്മിത വീഡിയോകള് തിരഞ്ഞെടുപ്പ് സമയത്ത് ഉപയോഗിക്കുന്നത് നിരോധിച്ചു തെരഞ്ഞെടുപ്പ് കമ്മീഷന്. എതിരാളികള്ക്കെതിരെ പ്രചാരണം നടത്താന് എഐ വീഡിയോകള് ഉപയോഗിച്ചുള്ള കണ്ടന്റുകള് ഉണ്ടാക്കാന് ഒരു സ്ഥാനാര്ത്ഥിയെയും അനുവദിക്കില്ല.
ഈ നിര്ദ്ദേശങ്ങള് എല്ലാ സ്ഥാനാര്ത്ഥികള്ക്കും ബാധകമാണെന്ന് ഊന്നിപ്പറഞ്ഞു. നവംബര് 6, 11 തീയതികളിലായി രണ്ട് ഘട്ടങ്ങളിലായി നടക്കാന് പോകുന്ന ബീഹാര് നിയമസഭാ തിരഞ്ഞെടുപ്പിന് മുന്നോടിയായാണ് ഈ നീക്കം, ഫലം നവംബര് 14 ന് പ്രഖ്യാപിക്കും. രാഷ്ട്രീയ പ്രചാരണങ്ങളില് ആര്ട്ടിഫിഷ്യല് ഇന്റലിജന്സിന്റെ ദുരുപയോഗം തടയുന്നതിനും സ്വതന്ത്രവും നീതിയുക്തവുമായ തിരഞ്ഞെടുപ്പ് ഉറപ്പാക്കുന്നതിനും വേണ്ടിയാണ് ഈ നിരോധനമെന്ന് ഇസി പറഞ്ഞു.
സ്ഥാനാര്ത്ഥികളും പാര്ട്ടികളും സോഷ്യല് മീഡിയയിലും ഇന്റര്നെറ്റിലും പോസ്റ്റ് ചെയ്യുന്ന എല്ലാ ഉള്ളടക്കവും ഈ മാര്ഗ്ഗനിര്ദ്ദേശങ്ങളില് ഉള്പ്പെടും. മാതൃകാ പെരുമാറ്റച്ചട്ടം അനുസരിച്ച്, രാഷ്ട്രീയപരമായ വിമര്ശനങ്ങള് മറ്റ് പാര്ട്ടികളുടെ നയങ്ങള്, പരിപാടികള്, മുന്കാല രേഖകള്, പൊതു പ്രവര്ത്തനങ്ങള് എന്നിവയില് മാത്രം പരിമിതപ്പെടുത്തണം, കൂടാതെ പാര്ട്ടികള് നേതാക്കന്മാരുടെയോ പ്രവര്ത്തകരുടെയോ പൊതുപ്രവര്ത്തനങ്ങളുമായി ബന്ധമില്ലാത്ത സ്വകാര്യ ജീവിതത്തെ വിമര്ശിക്കുന്നത് ഒഴിവാക്കണം. തെറ്റായ ആരോപണങ്ങള് ഉന്നയിക്കുന്നതില് നിന്നും അല്ലെങ്കില് വളച്ചൊടിച്ച വസ്തുതകളുടെ അടിസ്ഥാനത്തില് മറ്റുള്ളവരെ വിമര്ശിക്കുന്നതില് നിന്നും പാര്ട്ടികളും സ്ഥാനാര്ത്ഥികളും വിട്ടുനില്ക്കേണ്ടതുണ്ട്.
തിരഞ്ഞെടുപ്പ് പ്രക്രിയയുടെ സമഗ്രത നിലനിര്ത്തേണ്ടതിന്റെ ആവശ്യകത ഊന്നിപ്പറഞ്ഞുകൊണ്ട്, വിവരങ്ങള് കൃത്രിമം കാണിക്കുന്നതോ സോഷ്യല് മീഡിയ പ്ലാറ്റ്ഫോമുകളില് തെറ്റിദ്ധാരണ പരത്തുന്ന ഉള്ളടക്കം പ്രചരിപ്പിക്കുന്നതോ ആയ AI ഉപകരണങ്ങളുടെ ദുരുപയോഗം ഒഴിവാക്കാന് കമ്മീഷന് രാഷ്ട്രീയ പാര്ട്ടികളെ ഉപദേശിച്ചിട്ടുണ്ട്.
കൂടാതെ, എല്ലാ രാഷ്ട്രീയ പാര്ട്ടികളും, അവരുടെ നേതാക്കളും, സ്ഥാനാര്ത്ഥികളും, ഔദ്യോഗിക പ്രചാരകരും സോഷ്യല് മീഡിയയിലോ മറ്റ് പ്ലാറ്റ്ഫോമുകളിലോ പ്രചാരണത്തിനായി ഉപയോഗിക്കുന്ന ഏതൊരു എഐ-നിര്മ്മിത അല്ലെങ്കില് സിന്തറ്റിക് ഉള്ളടക്കത്തിനും ‘എഐ-നിര്മ്മിതം’, ‘ഡിജിറ്റലായി കൃത്രിമം കാണിച്ചത്’ അല്ലെങ്കില് ‘സിന്തറ്റിക് ഉള്ളടക്കം’ പോലുള്ള പദങ്ങള് വ്യക്തമായി ലേബല് ചെയ്യണം.
തിരഞ്ഞെടുപ്പ് അന്തരീക്ഷം മലിനമാക്കുന്നത് തടയാന് സോഷ്യല് മീഡിയ പോസ്റ്റുകളില് കര്ശനമായ നിരീക്ഷണം ഏര്പ്പെടുത്തുകയും എംസിസി മാര്ഗ്ഗനിര്ദ്ദേശങ്ങള് പാലിക്കുന്നുണ്ടെന്ന് ഉറപ്പാക്കാന് വിപുലമായ ക്രമീകരണങ്ങള് നടത്തുകയും ചെയ്തിട്ടുണ്ട്.
